Qazaqstan kópir qurylystaryn jobalaýda álemdik ozyq tájirıbeni engizbek
ASTANA. KAZINFORM — QazjolǴZI Polsha uıymdarymen kópirlerdi tsıfrlyq jobalaý baǵytyndaǵy birlesken jobalardy iske qosady.
«Qazaqstan jol ǵylymı-zertteý ınstıtýty» AQ kópir salasyn jobalaý, tsıfrlandyrý jáne normatıvtik-tehnıkalyq bazany damytý baǵytynda Polshanyń jetekshi salalyq uıymdarymen halyqaralyq yntymaqtastyqty keńeıtýde. Qol jetkizilgen jańa kelisimder zamanaýı ınjenerlik sheshimderdi engizýge jáne Qazaqstandaǵy kópir ınfraqurylymynyń senimdiligin arttyrýǵa baǵyttalǵan.
Halyqaralyq yntymaqtastyqtyń negizgi baǵyttarynyń biri Instytut Badawczy Dróg i Mostów — Polshanyń Avtomobıl joldary men kópirler ǵylymı-zertteý ınstıtýtymen áriptestikti damytý bolmaq. Taraptar Qazaqstannyń klımattyq, geologııalyq jáne paıdalaný erekshelikterin eskere otyryp, kópir qurylystarynyń tıptik konstrýktsııalaryn qoldaný boıynsha ǵylymı zertteýler júrgizýdi, pılottyq jobalardy birlesip iske asyrýdy jáne normatıvtik-tehnıkalyq qujattardy ázirleýdi josparlap otyr.
Yntymaqtastyqtyń taǵy bir mańyzdy baǵyty kópir qurylystaryn jobalaýǵa mamandanǵan MostyGdańsk Sp. z o.o. kompanııasymen memorandýmǵa qol qoıý boldy. Taraptar BIM-tehnologııalaryn engizý, tsıfrlyq modelder ázirleý, kópirlerdi jobalaý jáne tehnıkalyq-saraptamalyq qoldaý kórsetý baǵyttarynda birlesip jumys isteýge ýaǵdalasty.
Jobalaý jumystarynyń barlyq kezeńderinde aqparattyq modeldeý (BIM) tehnologııalaryn qoldanýǵa erekshe nazar aýdarylady. Tsıfrlyq modelderdi paıdalaný jobalyq sheshimderdiń sapasyn arttyrýǵa, jobalaý qujattamasyn ázirleý kezeńinde qatelikterdiń týyndaý yqtımaldyǵyn azaıtýǵa, sondaı-aq ınfraqurylymdyq jobalardy iske asyrýdyń tıimdiligin joǵarylatýǵa múmkindik beredi.
Sonymen qatar, taraptar kópirlerdiń tehnıkalyq jaı-kúıin tekserý men monıtorıngteýdiń zamanaýı ádisterin engizýdi, jasandy qurylystardy olardyń búkil ómirlik tsıkli boıy basqarý tásilderin jetildirýdi, sondaı-aq sala mamandaryn oqytý jáne olardyń biliktiligin arttyrý boıynsha birlesken jumystar júrgizýdi josparlap otyr.
Halyqaralyq yntymaqtastyqty damytý kásibı tájirıbe almasýmen qatar, álemdik ozyq tájirıbeni Qazaqstan jaǵdaıyna beıimdeýge múmkindik beredi. BIM-tehnologııalaryn, zamanaýı dıagnostıkalaý jáne monıtorıng ádisterin, sondaı-aq ozyq normatıvtik tásilderdi engizý kópir qurylystaryn jobalaý, salý jáne paıdalaný sapasyn jańa deńgeıge kóterýge yqpal etedi.
Aıta ketelik Oral qalasynda kólik júktemesin azaıtatyn jańa kópir salynatyny týraly jazǵan edik.
