Qazaqstan Konstıtýtsııasynyń braıl qarpinde jazylǵan nusqasy jaryq kórdi

PAVLODAR. KAZINFORM – Pavlodar oblysyna Braıl tilindegi Ata zańymyzdyń tórt danasy ákelindi. Zaǵıp jandar ony oblystyq kitaphanada jáne arnaıy kitaphanada oqı alady.

Elimizde kózi kórmeıtin jáne nashar kóretin azamattardyń óz quqyqtaryn qorǵaýǵa, zańnamalyq saýatyn jetildirýge, múmkindikterin kórsetýge tamasha múmkindikter jasalyp otyr. Toraıǵyrov atyndaǵy oblystyq kitaphanada QR Konstıtýtsııasynyń 30 jyldyǵyna arnalǵan is-shara ótip, onda Konstıtýtsııa kitabynyń braıl shrıfimen basylyp shyqqan jańa nusqasy tanystyryldy. Kitap ataýly mereıtoıǵa oraı QR Joǵarǵy sotynyń tapsyrmasy boıynsha jaryq kórgen.

- Bizdiń qolymyzda Konstıtýtsııanyń birneshe nusqasy bar: jalpaq baspa formatynda, Braıl qarpinde jáne fleshkaǵa jazylǵan MP3 aýdıo nusqasynda. Kópshiligi jumysqa kelgende nemese qajet bolǵanda qajetti baptaryn taýyp alyp oqıdy. Máselen, 28-bapta azamattarǵa eń tómengi jalaqy men áleýmettik tólemderdiń memleket tarapynan kepildendiriletini jazylǵan. Bul – barshamyz úshin mańyzdy, – dedi tusaýkeserge qatysqan Qazaq zaǵıptar qoǵamynyń tóraǵasy Dúısenbi Qabdýlov.

Uıymdastyrýshylar atap ótkendeı, bul ıgi bastama – kózi kórmeıtin jandardyń eldiń basty qujatymen erkin tanysyp, azamattyq quqyǵyn tereń uǵynýyna múmkindik beretin tyń qadam. Braıl árpimen órnektelgen paraqtar – tek mátin emes, bul – júrekpen seziletin ádilet úni, úmit sáýlesi, teń múmkindiktiń belgisi. Zaǵıp jandar bul kitap arqyly ózderiniń qoǵamdaǵy tolyqqandy múshesi ekenin taǵy bir márte sezinetin bolady.

Eske sala keteıik, Konstıtýtsııanyń 30 jyldyǵyna oraı jańa kollektsııalyq monetalar satylymǵa shyǵady.