Qazaqstan Konstıtýtsııasy mańyzdy pánge aınalýy tıis — sarapshy pikiri

ASTANA. KAZINFORM — Qazaqstan Respýblıkasynyń Konstıtýtsııasy mańyzdy pán retinde oqytylýy tıis. Bul týraly QR Bas prokýratýrasy janyndaǵy Quqyq qorǵaý organdary akademııasynyń áleýmettik gýmanıtarlyq pánder kafedrasynyń meńgerýshisi Búrkit Nurmaǵanbetov málimdedi.

«Qazaqstan Respýblıkasynyń Konstıtýtsııasyna 30 jyl: myqty memleket, erkin qoǵam, jaýapty azamat» taqyrybynda ótken sarapshylar kezdesýinde sóz sóılegen Búrkit Nurmaǵanbetov qazaqstandyqtardyń Konstıtýtsııaǵa qatysty bilimi tómen ekenin tilge tıek etti.

— Biz joǵary oqý oryndarynda sabaq berip júrmiz. Baıqaǵanymyz — halyq Konstıtýtsııany bilmeıdi. Sebebi oqymaıdy, zerdesine toqymaıdy. Joǵary oqý oryndarynda qandaı mamandyqqa maman daıyndaıtynyna qaramastan, Konstıtýtsııa durys oqytylmaıdy. Ókinishtisi, elimizde Konstıtýtsııa jastardyń sanasyna sińirilip jatqan joq. Ata zań, qaǵıdalaryn tek bolashaq zańgerdiń ǵana emes, barlyq jastardyń sanasyna sińirýimiz kerek, — dedi ol baıandamasynda.

Saıası ǵylymdarynyń kandıdaty Ata Zań mańyzdy pán retinde oqytylýy kerek degen pikir bildirdi.

— Qazaqstan Respýblıkasynyń Konstıtýtsııasy «Qazaqstan halqynyń tarıhy» sekildi asa qurmetti jáne mańyzdy pán bolýy tıis. Sonda ǵana biz jastardyń boıyna memlekettik ıdeologııany da, qundylyqtardy da sińire alamyz, — dedi ol.

Aıta keteıik, Konstıtýtsııa kúnine oraı 27 myń atyraýlyqqa áleýmettik kómek berilmek.