Qazaqstan qonaqúıleri tuńǵysh ret MICHELIN Key belgisine ıe boldy
ASTANA. KAZINFORM — MICHELIN Guide álemdegi eń úzdik qonaqúılerdiń halyqaralyq tizimin — MICHELIN Key Selection 2026 jınaǵyn jarııalady. Bul týraly «Kazakh Tourism» Ulttyq Kompanııasy» AQ málim etti.
Qazaqstan bul bedeldi gıdtiń geografııasyna alǵash ret enip otyr. Otandyq qonaqúıler bedeldi jınaqqa qosylyp qana qoımaı, MICHELIN Key arnaıy belgisine ıe boldy.
MICHELIN Key — qonaqúı salasyndaǵy kýlınarııalyq «Mıshlen juldyzynyń» resmı balamasy. Táýelsiz ári anonımdi ınspektsııa qorytyndysy boıynsha elimizdegi 5 qonaqúı One MICHELIN Key («Bir Mıshlen kilti») belgisine ıe boldy:
- The Veil Hotel (Astana q.)
- The St. Regis Astana (Astana q.)
- The Ritz-Carlton, Astana (Astana q.)
- The Ritz-Carlton, Almaty (Almaty q.)
- Tenir Eco Hotel (Almaty q.)
Budan bólek, MICHELIN Guide usynystarynyń jalpy sanatyna Qazaqstannyń taǵy 9 qonaqúıi endi. Olardyń qatarynda: Sheraton Astana Hotel, Swissôtel Wellness Resort Alatau Almaty, Qazaq Auyl Eco Hotel, Qazaq Garden, Donatello Premium Almaty, Radisson Blu Hotel Almaty Airport, Zvezdnaya Eco-Hotel, YURTA Boutique Hotel jáne Medina Palace Hotel bar.
— Qazaqstandyq qonaqúılerdiń bul mártebeli tizimge enýi týrıstik ınfraqurylymdy júıeli damytý jáne qonaqjaılylyq standarttaryn arttyrýǵa baǵyttalǵan strategııalyq bastamalarynyń arqasynda múmkin boldy. Halyqaralyq deńgeıdegi mundaı baǵa Qazaqstannyń joǵary sapaly týrızm ortalyǵy retindegi bedelin arttyryp, sheteldik týrıster úshin tartymdylyǵyn kúsheıte túsedi, — delingen habarlamada.
MICHELIN Key belgisi 2024 jyly qonaqúı salasyn táýelsiz baǵalaý úshin qurylǵan. Baǵalaý barysynda 1900 jyldan beri meıramhanalarǵa qoldanylyp kele jatqan qatań ádisteme men joǵary talaptar negizge alynady. Nysandardy anonımdi ınspektorlar bes ámbebap krıterıı boıynsha baǵalaıdy: qonaqúıdiń qonaqqa óńirdiń bolmysyn asha bilýi, sáýleti men ınterer dızaınynyń sapasy, qyzmet kórsetý sapasy men jaılylyqtyń turaqtylyǵy, baǵa men kórsetilgen qyzmettiń sáıkestigi, sondaı-aq nysannyń daralyǵy men ózindik kolorıti.
One MICHELIN Key («Erekshe demalys») belgisi ózindik sıpaty bar jáne óz deńgeıindegi ortasha salalyq kórsetkishterden áldeqaıda joǵary qyzmet kórsetetin qonaqúılerge beriledi.
Eske sala keteıik, buǵan deıin qazaq ashanasy Jenevada Michelin meıramhanasynda tanystyrylǵanyn jazǵan edik.
Qazaqstandaǵy qonaqúı jáne demalys oryndarynyń sany kóbeıdi.
