«Qazaqstan» konıagyn óz úıinde jasady
ASTANA. QazAqparat - Taraz qalasynda óz úıinde araq pen konıak sııaqty alkogol ónimderin zańsyz jasaǵan er adam jaýapqa tartyldy, dep habarlaıdy QazAqparat tilshisi.
Sot materıaldaryna sáıkes, ótken jyly K. esimdi azamat sáýir men qazan aılary aralyǵynda óz úıinde zańsyz alkogol ónimderin jasady. Al konıak úshin «Qazaqstan»-nyń qoldanylǵan shólmekterin paıdalandy. Odan keıin tyǵyndarmen bitep, jalǵan eseptik-baqylaý markalaryn japsyrǵan. Sosyn barlyq zańsyz alkogol ónimderin qaladaǵy dúkenderge taratyp otyrdy. Sot otyrysynda tártip buzýshy er adam óz kinásin moıyndamady.
«Taraz qalasynyń №2 sotynyń sheshimi boıynsha K. esimdi azamat Qylmystyq kodekstiń 233-baby, 2-tarmaǵy boıynsha (aktsızdeletin taýarlardy aktsızdik markalarmen jáne (nemese) esepke alý-baqylaý markalarymen tańbalaýdyń tártibi men qaǵıdalaryn buzý, aktsızdik markalardy jáne (nemese) esepke alý-baqylaý markalaryn qoldan jasaý jáne paıdalanǵany úshin) kináli dep tanyldy. Oǵan qatysty 1 jyl 6 aıǵa bas bostandyǵyn shekteý jazasy qoldanyldy. Budan bólek, ol 62 592 teńge kóleminde memlekettik baj salyǵyn tóleýi tıis. Sot sheshimi zańdy kúshine engen joq», - delingen sottyń resmı habarlamasynda.
