Qazaqstan kómir óndirý kólemin ulǵaıtyp, jarty trıllıon teńge ınvestıtsııa tartpaq
ASTANA. KAZINFORM – Qazaqstan kómiriniń negizgi eksporttyq baǵyttary: Reseı, Polsha, Ózbekstan, Túrkııa, Úndistan, Malaızııa jáne basqa da elder.
Qazaqstannyń kómir ónerkásibi eldiń energetıkalyq qaýipsizdigin qamtamasyz etýde negizgi ról atqarýdy jalǵastyryp jatyr. Sala ishki naryqty turaqty qamtamasyz etip, eksporttyq áleýetti damytý arqyly kómir óndirý kóleminiń turaqty ósimin kórsetip otyr.
2025 jyldyń qorytyndysy boıynsha Qazaqstanda kómir óndirý kólemi 115 mln tonna bolyp, 2024 jylmen salystyrǵanda 7%-ǵa ósti. Onyń ishinde 85 mln tonna kómir ishki tutyný men kommýnaldyq-turmystyq qajettilikterge baǵyttalsa, eksport kólemi 30 mln tonna boldy.
Qazaqstan kómiriniń negizgi eksporttyq baǵyttary: Reseı, Polsha, Ózbekstan, Túrkııa, Úndistan, Malaızııa jáne basqa da elder.
2026 jyly kómir óndirý kólemin 128,9 mln tonna deńgeıine jetkizý josparlanyp otyr. Qazir kómir óndirýmen 40 jer qoınaýyn paıdalanýshy aınalysady.
Energetıka mınıstrligi kómir salasyna ınvestıtsııa tartý boıynsha júıeli jumys istep jatyr. 2025 jyly kelisimsharttarǵa sáıkes jumys baǵdarlamalary aıasyndaǵy ınvestıtsııa kólemi 305 mlrd teńge bolsa, 2026 jyly 553 mlrd teńge ınvestıtsııa tartý kútilýde.
Geologııalyq barlaý jumystaryn damytýǵa erekshe nazar aýdarylýda. Bıylǵy jyldyń sońyna deıin 10 jer qoınaýy ýchaskesi boıynsha kómir ken oryndaryna jer qoınaýyn paıdalaný quqyqtaryn berý jóninde aýktsıon ótkizý josparlanǵan.
Eske salsaq, Qazaqstan kómir qory boıynsha álemdegi jetekshi elderdiń qataryna kiredi jáne dúnıejúzinde 10-orynda tur. Jalpy kómir qory 33,6 mlrd tonna. Qazirgi óndirý kólemin eskersek, bul qor eldi 300 jyldan astam ýaqytqa jetkilikti resýrspen qamtamasyz etedi.
Aıta ketelik ulttyq joba kómir generatsııasynyń otyn-logıstıkalyq turaqtylyǵyn qamtamasyz etetini týraly jazǵan edik.
