Qazaqstan kómir qory boıynsha álemdegi jetekshi 10 eldiń qataryna kiredi
ASTANA. KAZINFORM — Qazaqstan Respýblıkasynyń Premer-mınıstri Oljas Bektenovtiń tóraǵalyǵymen ótken Úkimet otyrysynda kómir energetıkasyn damytý jáne kómir generatsııasy jónindegi ulttyq jobany júzege asyrý máseleleri qaraldy.
Onda energetıka mınıstri Erlan Aqkenjenov, «Samuryq-Energo» AQ basqarma tóraǵasy Qaırat Maqsutov, Qaraǵandy jáne Pavlodar, Abaı oblystarynyń basshylary, sondaı-aq «Bogatyr Kómir» jáne «Qarmet» kómir óndirý kásiporyndarynyń ókilderi baıandama jasady.
— Memleket basshysy Ulttyq quryltaıda kómir energetıkasyn damytýdyń mańyzdylyǵyna toqtalyp, kómirmen qýat óndirý isi boıynsha Ulttyq joba qabyldaýdy tapsyrdy. Joba aıasynda 5 jyl ishinde jańa stansa salý jáne qoldanystaǵy 11 stansany jańǵyrtý esebinen 8 GVt qosymsha energııa qýatyn alý kózdelip otyr. Kómir ónerkásibi jáne kómir stansalarynda elektr energııasyn óndirý otandyq otyn-energetıkalyq keshenniń negizgi salalary sanalady. Olar elimizdiń energetıkalyq qaýipsizdigin qamtamasyz etedi. Memleket basshysy el ekonomıkasynda kómirmen qýat óndirý isiniń mańyzyn árdaıym atap ótip, salany odan ári damytý úshin birqatar baǵyttardy aıqyndap berdi. Kómir qory boıynsha biz álemdegi jetekshi 10 eldiń qataryna kiremiz. Bul – bizdiń eleýli básekelik artyqshylyǵymyz, ony tıimdi paıdalanýymyz kerek, — dep atap ótti Oljas Bektenov.
Osy jıynda bıyl kómir salasyna 553 mln teńge ınvestıtsııa tartylatyny aıtyldy.
Al Pavlodar men Qaraǵandyda kómirden dızel óndiretin jobalar iske asyrylady.
