Qazaqstan kómiri qaı elderge eksporttalady
ASTANA. KAZINFORM — Bıyl elimizde 129 mln tonnaǵa jýyq kómir óndirý josparlanyp otyr. Bul týraly Úkimet otyrysynda Energetıka mınıstri Erlan Aqkenjenov aıtty.
— Kómir ónerkásibi elimizdiń energetıkalyq qaýipsizdigi úshin negizgi mánge ıe. Qazaqstanda kómirdiń aıtarlyqtaı qory bar jáne ol boıynsha álemde 10-orynda tur. Qazirgi kezdegideı óndirý kólemi bolǵan jaǵdaıda, kómir qory 300 jyldan astam ýaqytqa jetedi. Kómirdiń iri ken oryndary: Ortalyq Qazaqstanda ornalasqan Qaraǵandy kómir basseıni, Torǵaı kómir basseıni, Shubarkól, Jalyn ken oryndary. Soltústik-Shyǵys óńiri: Ekibastuz kómir basseıni, Maıkúbi kómir basseıni, Qarajyra ken orny. Elimizdegi kómir qory 33,6 mlrd tonna, — dedi mınıstr.
Onyń aıtýynsha, sala ishki naryqty turaqty jabdyqtaýdy jáne eksporttyq jetkizilimderdi ulǵaıtýdy qamtamasyz ete otyryp, kómir óndirisiniń ósýin kórsetýde. Óndiriletin kómirdiń negizgi bóligi ishki naryqqa jiberiledi jáne elektr energetıkasynda, kommýnaldyq-turmystyq sektor men ónerkásipte paıdalanylady. Kómir eksporttaý deńgeıi saqtalyp otyr.
— 2025 jyldyń qorytyndysy boıynsha kómir óndirý shamamen 115,9 mln tonna boldy nemese 2024 jylmen salystyrǵanda 7 paıyzǵa ósti. Kommýnaldyq-turmystyq maqsattarǵa jáne ishki tutynýǵa 85,9 mln tonna paıdalanyldy, al kómir eksporttaý 30 mln tonnaǵa jetti. Kómir eksporttaýdyń negizgi baǵyttary: Reseı Federatsııasy, Polsha, Ózbekstan, Túrkııa, Úndistan jáne Malaızııa jáne taǵy basqalary. 2026 jyly 128,9 mln tonna deńgeıinde kómir óndirý josparlanady, — dedi Erlan Aqkenjenov.
Aıta ketelik 2030 jylǵa deıin kómir generatsııasy qalaı ózgeretini týraly jazǵan edik.