Qazaqstan kómir-hımııany damytýǵa basymdyq beredi
ASTANA. KAZINFORM — Qazaqstan kómirdi tek otyn retinde emes, tereń óńdeýge arnalǵan mańyzdy shıkizat retinde qarastyryp otyr. Bul týraly Energetıka vıtse-mınıstri Sanjar Jarkeshov Qazaqstan kómir ónerkásibiniń VII forýmynda málimdedi.
Vıtse-mınıstrdiń aıtýynsha, kómir-hımııa ónerkásibin damytý Memleket basshysy belgilegen ekonomıkany ártaraptandyrý baǵytyna tolyq sáıkes keledi jáne kómirdi jaǵýǵa negizdelgen dástúrli úlgiden joǵary qosylǵan quny bar ónim óndirýge baǵyttalǵan ekonomıkaǵa kóshýge múmkindik beredi.
— Jahandyq energetıka júıesi ózgerip jatqan kezeńde Qazaqstan kómirdi tek energııa kózi retinde emes, tereń óńdeýge jáne joǵary qosylǵan quny bar ónim óndirýge múmkindik beretin qundy shıkizat retinde qarastyrady, — dedi Sanjar Jarkeshov.
Onyń sózinshe, kómir-hımııany damytý jańa ındýstrııalyq klasterler qurýǵa, óńdeý ónerkásibiniń áleýetin arttyrýǵa jáne ekonomıkanyń jańa baǵyttaryn qalyptastyrýǵa jol ashady.
Sanjar Jarkeshov sondaı-aq Qazaqstannyń kómir qory shamamen 33,6 mlrd tonnany quraıtynyn atap ótti. Onyń aıtýynsha, mundaı kólem uzaq merzimdi óndiristik jobalardy iske asyrýǵa, jańa kásiporyndar ashýǵa jáne kómir-hımııa salasyn turaqty damytýǵa berik resýrstyq negiz qalyptastyrady.
Eske salaıyq, buǵan deıin kómir ónerkásibin damytý jospary ázirlenetini habarlaǵan edi.
