Qazaqstan kómiri Eýropaǵa Reseı porttary arqyly qaıta eksporttalady
ASTANA. KAZINFORM – Qazaqstan Reseı arqyly Eýropaǵa qaıta kómir tasymaldaý týraly kelisimge qol jetkizdi. Bul týraly Saýda jáne ıntegratsııa mınıstrliginiń baspasóz qyzmeti habarlady.
— 2025 jyldyń aqpanynda Eýropalyq odaq sanktsıalardyń 16-paketi aıasynda Reseı porttarymen kez kelgen kelisimge tyıym salǵan edi. Bul shara Qazaqstan kómirin Eýropa elderine turaqty eksporttaýǵa aıtarlyqtaı qaýip boldy. Sebebi Reseıdiń Ýst-Lýga porty áýelden Qazaqstan kómirin Eýropaǵa jetkizetin negizgi tranzıt núktesi retinde paıdalanylady.
Qalyptasqan jaǵdaıdy retteý maqsatynda Saýda jáne ıntegratsııa mınıstrligi Syrtqy ister mınıstrligimen jáne Qazaqstan Respýblıkasynyń Eýropalyq odaq janyndaǵy turaqty ókildigimen birlesip, eýropalyq tarappen túrli deńgeıdegi konsýltatsııalar júrgizdi. Eýropalyq komıssııanyń atyna EO sanktsııalyq rejımine tıisti ózgerister engizý týraly resmı ótinish jiberildi, — delingen mınıstrlik habarlamasynda.
Kelissózder nátıjeli boldy. EO-nyń 18-paket sanktsııalary aıasynda Eýropalyq tarap qazaqstandyq kómir tranzıti úshin belgili bir Reseılik porttarymen kelisimge shekteýdi alyp tastady.
Bul shara kelesi sharttardy saqtaǵankezde qoldanylady:
— kómirdiń shyǵý tegi tek Qazaqstan Respýblıkasy bolýy kerek;
— júkke menshik quqyǵy sanktsııalyq shekteý sharalary qoldanylatyn elderdiń rezıdentterinde bolmaýy kerek;
— porttardy tek tranzıt, tıeý nemese jóneltý aýmaǵy retinde paıdalanýǵa bolady, ıaǵnı onyń aýmaǵynda taýardy satyp alý nemese óndirýge bolmaıdy.
Anyqtama: 2022 jyly qazaqstandyq kómirdiń EO-ǵa eksportynyń kólemi 4.4 mln tonna, quny $419.2 mln boldy (úlesi — jalpy kómir eksportynyń 45%).
2023 jyly — $382 mln-ǵa 6.1 mln tonna (54,3%).
2024 jyly — $312,5 mln-ǵa 5,2 mln tonna (51 8%).
2025 jylǵy qańtar-mamyr aılarynda eksport $82,9 mln-ǵa 1,6 mln tonnany, nemese jalpy kómir eksportynyń 38,5% qurady.
Kórsetkishterdiń ýaqytsha tómendeýine qaramastan, qabyldanǵan sharalar Qazaqstan kómirin EO-ǵa jetkizýdi qalpyna keltirýge, sondaı-aq logıstıkalyq marshrýttardyń turaqtylyǵyn nyǵaıtýǵa septigin tıgizedi.
Saýda jáne ıntegratsııa mınıstrligi elimizdiń saýda múddelerin qorǵaý jáne ulttyq eksportty qoldaý jónindegi, sondaı-aq negizgi áriptestermen ekonomıkalyq baılanystardy odan ári damytý boıynsha jumystardy jalǵastyrady.
Aıta ketelik Qazaqstanda kómir óndirýshilerdi qaıta óńdeýge mindetteıdi.