Qazaqstan kómir eksportyn ulǵaıtty

NUR-SULTAN. QazAqparat – Qazaqstan osy jyldyń 6 aıynda 271 mlrd teńgeniń kómirin óndirdi, dep habarlaıdy QazAqparat tilshisi.

Energyprom.kz portalynyń málimetinshe, osy jyldyń qańtar-maýsymynda elimizde lıgnıt (sapasy tómen qońyr tas kómir) pen kómir kontsentratyn qosa alǵanda 57,4 mln tonna tas kómir óndirildi.

Bul bir jyl burynǵy kórsetkishten 5,9 paıyzǵa joǵary. Al aqshaǵa shaqqanda 271 mlrd teńgeni qurady.

Onyń ishinde 53 mln tonna tas kómir, 2,6 mln tonna lıgnıt jáne 2 mln tonna kómir kontsentraty alyndy.

Óńirler arasynda Pavlodar oblysy jyl ishinde kómir óndirisi 4,9 paıyzǵa arttyryp, 33,9 mln tonnaǵa jetkizdi.

Ekinshi orynda Qaraǵandy oblysy tur. Óńir bir jyldyń ishinde kómir óndirisin 2,3 tonnaǵa ulǵaıtyp, 18,4 mln tonna kómir óndirdi.

Qazaqstan qańtar-mamyr aılarynyń qorytyndysynda 344,2 mln dollarǵa 13,7 mln tonna kómir eksporttady.

Bir jyl ishinde naqty mándegi ósim 21,1, al aqshaǵa shaqqanda 91,5 paıyzdy qurady.

Kómirdiń basym bóligi, 9,1 mln tonnasy TMD elderine jóneltildi. Qazaqstan ónimin negizgi ımporttaýshy Reseı boldy.

Bul el osy jyldyń 5 aıynda 8,4 mln tonna kómir satyp aldy. Sonymen qatar úzdik úshtikke Qyrǵyzstan men Belarýs kiredi.

Al TMD elderine kirmeıtin qalǵan memleketterge 4,6 mln tonna kómir jóneltildi.

Bul rette Shveıtsarııa 3,3 mln tonna kómir satyp aldy. Odan keıingi orynda Polsha men Kıpr tur.