Qazaqstan komandasynyń Germanııa jáne Belgııamen ótetin fýtbol oıyndaryna jankúıerlerdi ekspress-avtobýstar jetkizip salady

Bul týraly búgin ótken baspasóz máslıhatynda Jolaýshylar kóligi jáne avtomobıl joldary basqarmasynyń bólim bastyǵy Ábdihamıt Tamabaev málim etti.

Buǵan deıin habarlanǵandaı, 2012 jylǵy Eýropa chempıonatyna irikteý matchtary elordadaǵy «Astana-Arena» stadıonynda qazannyń 8-i kúni Qazaqstan men Belgııa (bastalýy saǵat 22.00-de), qazannyń 12-si kúni Qazaqstan men Germanııa (23.00) qurama komandalarynyń arasynda ótedi.

Á.Tamabaevtyń aıtýynsha, bul kúnderi jankúıerlerdi alańǵa deıin qolaıly jetkizý úshin qalanyń birneshe aýdanynan ekspress-avtobýstar uıymdastyrylady. Olar - Jeńis dańǵyly boıynda ornalasqan QR Qarjy mınıstrliginiń aldynan (7 avtobýs), Ál-Farabı shaǵyn aýdanyndaǵy Respýblıkalyq Ulan (6), «Qazaqstan» SK (7), «Báıterek» monýmenti men Astanalyq tsırk ǵımaraty (6) aldynan júredi.

Ekspress-baǵdarlardyń qozǵalysy saǵat 19.00-de bastalyp, toqtaýsyz júzege asyrylady. Jol júrý aqysy eki baǵyt boıynsha - 100 teńge.

Sondaı-aq kórermender stadıonǵa deıin №10, 12, 27, 30, 40, 43 baǵdarly qoǵamdyq kólikterimen de jete alady. Sonymen birge, osy kúni saǵat 19.00-den bastap ózge baǵyttardaǵy №18, 20 jáne 41-shi avtobýstardyń júrý syzbasy stadıonǵa deıin uzartylady. Ár marshrýttyń qozǵalys aralyǵy 10-12 mınýt. Qoǵamdyq kólikterdegi jol júrý aqysy - 60 teńge.

Al matchtar aıaqtalǵan ýaqytta stadıon alańynyń birinshi jolynan eksperss-avtobýstar júredi. Kólikter jolaýshylardy joǵaryda atalǵan bes núktege deıin qaıta jetkizip salady. Al ol núktelerden, ıaǵnı Qarjy mınıstrliginiń aldynan №9, 17, 46, 47, 112-shi baǵdarly qoǵamdyq kólikter, Respýblıkalyq Gvardııa aldynan №5 jáne 41-shi, «Qazaqstan» SK aldynan №104, (13), 16 jáne 4-shi avtobýstar júredi.

Sondaı-aq oıyndardan keıin kórermender №10, 12, 30, 40, 43, 18, 20 jáne 41-shi baǵyttaǵy qoǵamdyq kóliktermen de jete alady. Olardyń jumys ýaqyty bul kúnderi túngi saǵat bir jarymǵa deıin uzartylady.