Qazaqstan komandasy halyqaralyq matematıkalyq Olımpıadada júldeli boldy
NUR-SULTAN. QazAqparat - Qazaqstan qurama komandasy 61-shi Halyqaralyq matematıkalyq Olımpıadada (International Mathematical Olympiad) úsh kúmis jáne eki qola medal jeńip aldy, dep habarlaıdy QazAqparat.
IMO 2020 jarysyna álemniń 100-den astam elinen joǵary synyp oqýshylary qatysty. Qazaqstandyq komandanyń quramynda 6 adam boldy.
«Olımpıada proktorıng júıesi arqyly ótti. Jarys búgin resmı túrde aıaqtalady. Qazaqstannyń komandalyq nátıjeleri ótken jylmen salystyrǵanda aıtarlyqtaı jaqsardy. Altyn medal jeńip alýǵa bir ǵana upaı jetpedi. Negizinen bizdiń balalarymyz óte myqty. Ár bala óz aldyna qoıǵan maqsatyna jete alady. Osy rette balalarǵa qoldaý kórsetý mańyzdy. Ata-analar men pedagogterge birlesken eńbegi úshin alǵys aıtamyn», – dedi qurama komandanyń tálimgeri Qanat Satylhanov.
El namysyn qorǵaǵan komanda quramyna Taır Satýbaldın (Almaty), Tamırlan Bektemisov (Almaty), Nurtas Shyntas (Almaty), ıÝrıı Ten (Almaty ), Danat Dúısenbekov (Nur-Sultan ) jáne Fetýllah Sam (Nur-Sultan) kirdi.
