Qazaqstan komandasy balalar men jasóspirimderdiń «Copa Coca-Cola» halyqaralyq týrnırine qatysady
ALMATY. 6 qyrkúıek. QazAqparat - Balalar men jasóspirimderdiń «Copa Coca-Cola bylǵary Dop» týrnıriniń jeńimpazy bolǵan qazaqstandyq komanda elimizdiń namysyn balalar men jasóspirimderdiń «Copa Coca-Cola» halyqaralyq týrnırinde qorǵaıtyn bolady.
«Copa Coca-Cola» týrnıri balalar men jasóspirimderdiń kásiptik emes komandalary arasyndaǵy shaǵyn «álemdik birinshilik» bolyp tabylady, osy týrnırden keıin balalardyń kópshiligine úlken fýtbolǵa jol ashylady.
Bıylǵy jyldyń mamyr aıynda ótken «Coca-Cola Bylǵary Dop» týrnıriniń fınaldyq oıynynda jeńimpazdy tek penaltı jolymen anyqtaýǵa týra keldi, nátıjesinde Jambyl oblysynyń Merke aýyly № 17 orta mektebiniń balalary ozyp shyqty. Otandyq fýtboldyń tarıhynda ekinshi ret «Coca-Cola Bylǵary Dop» týrnıriniń eresekter tobynyń jeńimpazdary, eń sońǵy álem birinshiliginiń astanasy OAR-nyń Pretorııa qalasyndaǵy ataqty Tuks Sport Campus sport ortalyǵynda qyrkúıek aıynda ótetin úlken halyqaralyq túrnırde bizdiń elimizdiń namysyn qorǵaıdy. Kelisimen jerebe tartylyp, bizdiń balalar ózderiniń qarsylastaryn biledi. Oıyndar birneshe jerde ótedi, al fınaldyq báseke «Tuks Soccer Stadium» alańynda bolyp, onda barlyq qatysýshylar áýesqoı komandalar arasyndaǵy álem chempıony ataǵy úshin talasatyn qyzyqty oıyndy tamashalaıdy.
Bizdiń komanda osy sapar aldynda, Taraz jáne Almaty qalalarynda birneshe oqý-jattyǵý jıyndaryn ótkizdi. Tarazda «Taraz» FK qoldaýymen Jambyl oblysynyń balalar men jasóspirimder fýtbol ortalyǵynyń jáne «Taraz» FK balalar komandalary bapkerleriniń kómegimen oıyndar uıymdastyryldy.
Osy jıyndar kezinde balalar býyndaryn qyzdyryp, ártúrli oıyn tásilderin qaıtalap, jattyǵýlar jasady, sondaı-aq «Taraz» FK balalar men jasóspirimder komandasymen jáne aımaqtyq fýtbol ortalyqtarynyń komandalarymen sparrıng-kezdesýler ótkizdi.Osy kezdesýler barysynda klýbtyń mamandary balalardyń oıyndaryn baqylap, olardyń keıbireýine «Taraz» FK jastar komandasynda óz kúshterin synap kórýdi usynýǵa daıyn ekendikterin bildirdi.
