Qazaqstan komandasy aralas jekpe-jekten Azııa chempıonatynda 7 altyn, 9 kúmis jáne 10 qola júlde aldy
ASTANA. KAZINFORM – Pákistannyń Lahor qalasynda IMMAF qoldaýymen MMA-dan Azııa chempıonaty ótti. Baıraqty básekede Qazaqstan quramasy qarsylas shaq keltirmeı, 10-shy márte jeńiske jetti. 12 eldiń sportshylary qatysqan jarysta Ulttyq qurama atynan el namysyn 38 sportshy qorǵady. Otandyq sportshylar 18-20 jas aralyǵyndaǵy jastar, 21 jastan asqan eresekter arasynda úzdik atandy.
Aıta ketý kerek, qazaqstandyq sportshylar mundaı jetistikke qatarynan 10-shy ret qol jetkizip otyr. Buǵan deıin ótken toǵyz Azııa chempıonatynda da Qazaqstan jeńis tuǵyrynan kóringen bolatyn.
Pákistanda ótken Azııa birinshiliginiń qorytyndysy boıynsha otandastarymyz 7 altyn, 9 kúmis jáne 10 qola júldege ıe boldy. Ulttyq quramanyń qorjynyna birinshi bolyp Qaraǵandy oblysynyń atynan qatysqan Serikbaı Madııar («jastar» dıvızıony, salmaq dárejesi 61,2 kg) altyn medal saldy. Al ulttyq quramanyń eki sportshysy Erulan Qabdýlov pen Adel Mahametova IMMAF Azııanyń úsh dúrkin chempıondary ataǵyn birden rastady. Sondaı aq, Aqmola oblysynyń ókili Velıev Zohrab (61,2 kg), BQO-dan Shabdan Samǵat (65,8 kg), atyraýlyq Asadov Neımat (70,3 kg) jáne Aqmola oblysynan Bachýrına Matıldada (52,2 kg) altyn júldege qol jetkizip, el mereıin ústem etti.
«Komanda is júzinde jetpis paıyzǵa jańardy. Balalardyń kópshiligi Azııa chempıonatyna alǵash ret keldi. Básekelestik óte joǵary boldy. Biz buryn baıqamaǵan Pákistan komandasy bizdi tań qaldyrdy. Kútkendeı, Qazaqstan, Tájikstan jáne Bahreın komandalary arasynda naǵyz teketires boldy», - dedi aralas jekpe-jekten QR Ulttyq quramasynyń bas bapkeri Baıan Janǵalov.
Alaıda qazaqstandyq sportshylar munymen toqtap qalmaıtynyn jetkizdi. Álemniń bes dúrkin júldegeri, Azııanyń úsh dúrkin chempıony, halyqaralyq dárejedegi sport sheberi Erulan Qabdýlov alda álemdik birinshilik kútip turǵanyn atap ótti.
«Iá, bizdiń sportshylar barlyq jekpe-jek kúrdeli bolǵanyna qaramastan, ózderin taǵy da kórsetti. Biraq bizdiń basty maqsatymyz – álem chempıonatynda jeńiske jetý. Biz úıge bir aptaǵa baramyz, demalamyz, sodan keıin daıyndyqty qaıtadan bastaımyz. Demalýǵa bolmaıdy», - dedi Qabdýlov.
Álem chempıonaty 4-12 qarashada Tashkentte ótedi. Qazaqstannyń MMA aralas jekpe-jek federatsııasy sportshylarǵa jan-jaqty qoldaý kórsetip jatyr. Jattyqtyrýshylar men shákirtterdiń judyryqtaı jumylǵan jumysynyń arqasynda komanda azııalyq jekpe-jek elıtasyna kirdi.
Esterińizge sala keteıik, aralas jekpe-jek (MMA) Qazaqstanda resmı sport túri mártebesine ıe boldy. Áýesqoı jáne kásibı aralas jekpe-jek 2013 jyly sport túri retinde tanyldy.
