Qazaqstan qoljetimdi baspana boıynsha Azııa elderi arasynda 13-orynda

ASTANA. QazAqparat – Qazaqstandaǵy turǵyn úıge qoljetimdilik kórsetkishi Numbeo sarapshylarynyń reıtıngi boıynsha óte jaqsy. Azııanyń 40 eli arasynda 13-oryn jáne álemniń 113 eli arasynda 33-orynda tur, dep habarlaıdy QazAqparat tilshisi.

Ranking.kz portalynyń jazýynsha, reıtıng páter quny men otbasynyń ortasha jyldyq tabysynyń araqatynasyna negizdelgen, ol «taza» jalaqyǵa baılanysty.

Salystyrý úshin: Ózbekstan bul reıtıngte nebári 75-orynǵa turaqtasa, Reseı – 88-orynda, Belarýs – 90-orynda.

Saýd Arabııasy, Birikken Arab Ámirlikteri sııaqty munaı men gazǵa baı elder reıtıng basynda, al Sırııa sońynda.

Degenmen, QR-daǵy 33-oryn áli de bolsa turǵyn úı alý múmkindiginiń jetkiliksiz ekenin kórsetedi.

Mysaly, RIA reıtıngi boıynsha Eýropanyń 33 eliniń arasynda Qazaqstan jan basyna shaqqandaǵy ıpotekalyq nesıeler kórsetkishi tómen (Ýkraınany eseptemegende), degenmen ıpotekalyq naryqtyń damý qarqyny basqa eldermen salystyrǵanda joǵary.

Elimizde jyljymaıtyn múlik quny jalpy óte qoljetimdi bolyp otyr.

Numbeo-nyń qala ortalyǵyndaǵy páter quny boıynsha elder reıtınginde Qazaqstan sharshy metrine 1000 AQSh dollaryn quraıtyn kórsetkishpen 104 eldiń arasynda 11-oryndy ıelendi.

Salystyrý úshin: Ózbekstan 14-shi, Belarýs 37-shi, Armenııa 60-shy, Reseı 70-orynda. Reıtıng basynda Mysyr, Pákistan jáne Venesýela, sońynda Gonkong (Qytaı).

Ulttyq statıstıka bıýrosynyń málimetinshe, QR-da bıyl qarashada jańa turǵyn úılerdiń baǵasy - sharshy metrine 435,9 myń teńge boldy (bir jylda 17,3% qymbattaǵan).

Al qaıtalama naryqtaǵy páterlerdiń quny sharshy metrine - 489,7 myń teńge (26,9% ósken).

Qarashada baǵanyń ósýi jańa baspanaǵa - 15,2, qaıtalama naryqta - 23,1 paıyz boldy.