Qazaqstan – Kolýmbııa matchy: Zarına Dııas pen Jibek Qulambaeva jeńis núktesin qoıdy

ASTANA. KAZINFORM — Aýstralııanyń Brısben qalasynda tennısten Bıllı Djın Kıng kýbogynyń irikteý týrnırinde Qazaqstan – Kolýmbııa matchy aıaqtaldy.

Bul joly juptyq synda Qazaqstan quramasy sapynda Jibek Qulambaevamen birge Zarına Dııas shyqty.

Bul olardyń Bıllı Djın Kıng kýbogy aıasynda alǵash ret birge óner kórsetýi edi.

Keshe J.Qulambaeva men Anna Danılına juptyq synda aýstralııalyqtar Storm Sanders pen Ellen Pereske 3:6, 4:6 esebimen jol bergen edi.

Almaty qalasynda týyp-ósken Jibek pen Zarına búgin ıÝlıana Lısaraso – Marııa-Paýlına Peres-Garsııamen oıynda birinshi partııada aıqyn basymdylyq kórsetti – 6:2.

Ekinshi sette esep 3:3 bolǵan mezette kolýmbııalyq jup breık jasaǵanymen, qazaqstandyq dýet ile-shala jaýap qaıyrdy – 4:4. Esep 5:4 bolǵanda, Jibek pen Zarına úsh matchboldy múlt jiberdi. Esesine kolýmbııalyqtar kúsh alyp ketti – 7:5. 

Úshinshi, sheshýshi sette kolýmbııalyqtar qos breıkpen alǵa ketti – 3:0. Degenmen qazaqstandyqtar birtindep tarazy basyn teńestirdi – 4:4. Aqyry altynshy matchbolyn paıdalana bildi – 6:4.

Osylaısha, eki saǵatqa jýyq ýaqytqa sozylǵan básekede qazaqstandyq jup 1 eıspen birge 15 breık-poınttyń jeteýin óz esepterine jazdy. Kolýmbııalyqtar 5 breıkpen (9 breık-poınt) shekteldi.

Sóıtip qazaqstandyqtar Kolýmbııa quramasyn 3:0 esebimen jeńdi. 

Ulttyq quramany qoldaý úshin Brısbenge kelgen Qazaqstan tennıs federatsııasynyń prezıdenti Bolat Ótemuratov osy jeńiske baılanysty óz pikirin bildirdi.

- Qazaqstan áıelder quramasy óz tarıhynda úshinshi ret eń bedeldi komandalyq týrnırdiń fınaldyq kezeńinde óner kórsetedi. Biz budan buryn 2022 jáne 2023 jyldary fınaldyq kezeńde oınadyq. Komandalyq álem chempıonatyna qatysý bizdiń komanda men barlyq tennıs júıesiniń joǵary deńgeıde ekendigin kórsetedi. Bul – kóp jyldyq qajyrly jumystyń nátıjesi, bul bizdiń baǵytymyzdyń durys ekendigin tanyta túsedi. Bul tabys – tek maqtanysh qana emes, sonymen qatar eldegi jas tennısshilerdi jańa asýlarǵa jetýge jigerlendiredi, - dedi B.Ótemuratov.

Erteń D tobynda Aýstralııa men Kolýmbııa komandalary ózara sheberlik baıqasady.

Eske sala keteıik, budan buryn Bıllı Djın Kıng kýbogynda Kolýmbııamen matchta ıÝlııa Pýtıntsevanyń Qazaqstandy alǵa shyǵarǵanyn jazǵan bolatynbyz.

Sondaı-aq Elena Rybakına bastaǵan Qazaqstan quramasy Bıllı Djın Kıng kýbogynyń fınaldyq kezeńine shyqty.

Bıllı Djın Kıng kýbogynda ıÝlııa Pýtıntseva rekordtyq nátıjege qol jetkizdi.