Qazaqstan qolma-qol aqshasyz tólemder boıynsha óńirde kósh bastap tur
ASTANA. KAZINFORM – Qazaqstan qolma-qol aqshasyz tólemderdiń úlesi boıynsha aımaqta kóshbasshy elge aınalyp otyr. Bul týraly Ulttyq bank tóraǵasynyń orynbasary Bınur Jálenov málimdedi.
– Qazaqstan – qolma-qol aqshasyz ekonomıkany damytý boıynsha óńirdegi sózsiz kóshbasshy. Ótken jyldyń qorytyndysy boıynsha qolma-qol aqshasyz tólemderdiń úlesi 90 paıyzdan asty jáne ósip keledi. Salystyrý úshin aıtsaq, TMD elderindegi ortasha kórsetkish 60 paıyzǵa da jetpeıdi, – dedi Bınur Jálenov.
Onyń sózinshe, sońǵy jyldary qolma-qol aqshasyz ekonomıkanyń kólemi qarqyndy ósti. Atap aıtqanda, 2016–2025 jyldary qolma-qol aqshasyz tólemder kólemi 116 ese ósip, 1,6 trln teńgeden 188 trln teńgege jetken.
- Qolma-qol aqshasyz tólem qabyldaıtyn ınfraqurylym da keńeıdi. Sońǵy on jylda POS-termınaldar sany 1,3 mln qurylǵyǵa jetip otyr, - dedi spıker.
Bınur Jálenovtiń aıtýynsha, mundaı nátıjege memlekettik tsıfrlandyrý saıasaty, halyqtyń tsıfrlyq servısterdi belsendi paıdalanýy jáne qarjy naryǵyndaǵy básekeniń kúsheıýi yqpal etken.
Eske salaıyq, 17 shildede Qazaqstanda bankaralyq QR arqyly tólem jasaý servısi iske qosyldy. Al 19 shildeden bastap biryńǵaı QR júıesine qatysý barlyq ekinshi deńgeıli bank úshin mindetti bolady.
