Qazaqstan kólik salasynda Eýrazııanyń biryńǵaı aqparattyq kartasyn qurýǵa bastamashy bolady
ASTANA. KAZINFORM - QR Kólik mınıstri Nurlan Saýranbaev Eýrazııanyń biryńǵaı aqparattyq kartasyn jasaýdy usyndy, dep habarlaıdy Kazinform agenttiginiń tilshisi.
Nurlan Saýranbaev Almatyda ótken «Jańa Jibek joly» VIІ halyqaralyq kólik-logıstıkalyq bıznes-forýmynda sóılegen sózinde kólik ınfraqurylymy salasyndaǵy halyqaralyq yntymaqtastyq pen aqparat almasýdyń mańyzdylyǵyn atap ótti.
Mınıstr sońǵy kezderi Túrkııa, Pákistan, Qytaı, Qyrǵyzstan, Túrikmenstan jáne Reseıge jasaǵan saparlaryn, onda túrli forýmdarǵa qatysqanyn tilge tıek etti.
- Forým – bul kezdesý ǵana emes, pikir, oı, tájirıbe almasý. Sapar barysynda biz elder arasynda baılanys pen aqparat almasýdyń az ekenin kórip otyrmyz. Máselen, Túrikmenstan Qazaqstanǵa zamanaýı beton jol salyp jatyr. Bizdiń jeke jobalarymyz bar, joldarymyzdyń ótkizý múmkindigi de ártúrli. Qyrǵyzstanda da, Reseıde de jaǵdaı osyǵan uqsas. Sondyqtan forýmdar bizdiń josparlarymyzdy úndestirýge jáne aqparat almasýǵa biregeı múmkindik beredi, - dep atap ótti Nurlan Saýranbaev.
Ol Qazaqstannyń kólik salasyndaǵy negizgi bastamalaryn atap ótti. Qazaqstan tarapy Eýrazııanyń biryńǵaı aqparattyq kartasyn qurýǵa bastamashylyq etedi.
- Biz Eýrazııanyń biryńǵaı úlken kartasyn jasaǵymyz keledi, sonda iri strategııalyq baǵyttarda ornalasqan barlyq elder ózderiniń bolashaq jospary men damýy týraly aqparat almasa alady. Jalpy, temirjolǵa qatysty bizde naqty túsinistik bar, aqparat almasý bar. Al avtomobıl joldaryna keler bolsaq, biryńǵaı iri baǵdarlama joq, - dedi mınıstr.
Mınıstr sondaı-aq Shyǵys-Batys jáne Soltústik-Ońtústik baǵyttarynda turaqtylyq pen ınvestıtsııalardy qorǵaýdy qamtamasyz etetin logıstıkalyq jobalar boıynsha ózara salalyq úkimetaralyq kelisimder qajettigin atap ótti.
- Logıstıkalyq ónimder naqty merzimderdi, baǵalardy jáne qyzmet kórsetý sapasyn talap etedi. Marshrýt birneshe el arqyly ótkende sharttar, baǵalar men merzimder ózgerýi múmkin. Іri logıstıkalyq jobany júzege asyrý kezinde, bizdiń pikirimizshe, úkimetaralyq kelisimder óte mańyzdy. Bul ıdeıany Qazaqstan prezıdenti Qasym-Jomart Toqaev Túrkııaǵa sapary kezinde alǵa tartyp, ózara kelisimdi qaıta bastaý qajettigin basa aıtty. Barlyq elderdi qamtıtyn Transkavkazdyq kólik joly (KTR) Qazaqstannyń bastamasymen jasalǵan. Bul úkimetaralyq kelisimge eki tarap qol qoıady, sodan keıin baǵyt boıynsha basqa elder de qosyla alady, - dep qosty ol.
Mınıstr ár el logıstıkalyq ónimge qomaqty ınvestıtsııa salyp jatqanyn atap ótti. Jaqynda Qazaqstan shamamen 35 mıllıard dollar ınvestıtsııalady, taǵy 15 mıllıard dollar ınvestıtsııalaýdy josparlap otyr, bul ınvestıtsııanyń jalpy kólemin 50 mıllıard dollarǵa jetkizý kerek. Bul ınvestıtsııalar uzaq merzimdi nátıje berýi tıis.
Qorytyndylaı kele, mınıstr áriptesteri men seriktesterine yntymaqtastyǵy úshin alǵys aıtyp, aldaǵy halyqaralyq kórmelerdiń mańyzdylyǵyna toqtaldy.
- Jaqyn arada Grýzııa, Ózbekstan jáne Pákistanda iri kórmeler ótedi dep kútip otyrmyz. Qazaqstan osy sharalardyń barlyǵyna qatysyp, Eýrazııanyń damýyna óz úlesin qosady, - dedi Nurlan Saýranbaev.
Esterińizge sala keteıik, dál qazir Almatyda «New Silk Way» VIІ halyqaralyq kólik-logıstıkalyq bıznes forýmy ótip jatyr.
Memleket basshysy Qasym-Jomart Toqaev telekópir arqyly «New Silk Way» bıznes-forýmyna qatysyp, Dostyq-Moıynty temirjol ýchaskesiniń ekinshi jolyn iske qosty. Bul jobanyń Qazaqstan ekonomıkasyna tıgizer paıdasyn QR Prezıdentiniń kómekshisi - baspasóz hatshysy Rýslan Jeldibaı talqylady.