Qazaqstan kólik dálizderin belsendi damytyp jatyr – Shavkat Mırzıeev

TAShKENT. KAZINFORM – Ortalyq Azııa memleketteri basshylarynyń VII Konsýltatıvtik kezdesýine oraı Ózbekstan Prezıdenti Shavkat Mırzıeevtiń «Jańa dáýir qarsańyndaǵy Ortalyq Azııa» atty maqalasy jarııalandy, dep habarlaıdy Kazinform agenttiginiń menshikti tilshisi.

Maqalada Shavkat Mırzıeev óńir elderi arasyndaǵy ıntegratsııaǵa baǵa berip, keleshek damýǵa qatysty ortaq ustanymdaryn baıandaǵan.

- Ortalyq Azııa damýdyń jańa tarıhı mańyzdy kezeńine aıaq basty. Bizdiń óńirde senim, tatý kórshilik jáne ózara qurmet keńistigi qalyptasyp keledi. Bul óz kezeginde birlese alǵa jyljýǵa negiz bolady, - delingen maqalada.

Ózbekstan basshysy aımaqtaǵy ıntegratsııa úrdisine erekshe toqtala otyryp, jan-jaqty baılanystardy nyǵaıtýǵa qosqan ár memlekettik úlesin atap ótti.

- Qazaqstan kólik dálizderin belsendi damytyp, shekara beketterin jańǵyrtyp, saýda kedergilerin joıýǵa baǵyttalǵan jobalardy iske asyryp jatyr. Qyrǵyzstan men Tájikstan muzdyqtardyń erýi, energetıka, kólik-logıstıkasy salalary boıynsha ózara yntymaqtasady. Al Túrkimenstan beıbitshilik pen senimdi nyǵaıtý, óńirdiń tranzıttik áleýetin arttyrý, BUU-nyń Aral basseıni men klımattyq tehnologııalar jónindegi baǵdarlamasyn qabyldaý jóninde mańyzdy bastamalar kóterip keledi, - dep atap ótken Shavkat Mırzıeev óziniń maqalasynda.

Ózbekstan prezıdentiniń paıymynsha, keıingi jyldary shekaradan ótý rásimderi ońtaılandyrylyp, gýmanıtarlyq baılanystar nyǵaıyp keledi.

- 2023 jyldyń qyrkúıeginen bastap Ózbekstan men Qyrǵyzstan azamattary shekaradan ID-karta (jeke kýálik – avt.) arqyly erkin ótip júr. Osyndaı kelisimder Qazaqstan jáne Tájikstan taraptarymen pysyqtalyp jatyr, - delingen maqalada.

Shavkat Mırzıeev óńirlik yntymaqtastyqqa joǵary baǵa bere otyryp, Ortalyq Azııadaǵy bolashaq ıntegratsııaǵa qatysty óz kózqarasyn baıandaǵan. Ol qaýipsizdik, energetıka, kólik-logıstıka, ónerkásiptik kooperatsııa, ekologııa baǵyttarynda yqpaldastyq keleshek seriktestiktiń negizi bolatynyn atap ótken.

Qosa keteıik, 14-15 qarasha kúnderi Memleket basshysy Qasym-Jomart Toqaev Ózbekstan Prezıdenti Shavkat Mırzıeevtiń shaqyrýymen Tashkentke memlekettik saparmen keledi. Taraptar 15 qarashada áýeli shaǵyn, keıin keńeıtilgen quramda kelissóz júrgizedi. Prezıdentter saýda, ónerkásiptik kooperatsııa, kólik jáne logıstıka, energetıka, sý resýrstary, mádenı-gýmanıtarlyq salalardaǵy jobalardy talqylap, yntymaqtastyqtyń basym baǵyttaryn aıqyndaıdy.