Qazaqstan kólik jáne kommýnıkatsııa salasynda shet eldik ınvestorlarǵa barlyq múmkindikterdi jasap otyr - QR Kólik jáne kommýnıkatsııa mınıstri
ALMATY.Maýsymnyń 4-i. QazAqparat. /Erbol Azanbek/- Qazaqstan kólik jáne kommýnıkatsııa salasynda shet eldik ınvestorlarǵa barlyq múmkindikterdi jasap otyr. Almatyda ótip jatqan 4-shi Qazaqstandyq ınvestıtsııalyq sammıt barysynda QR Kólik jáne kommýnıkatsııa mınıstri Ábilǵazy Qusaıynov osylaı málimdedi.
Mınıstrdiń aıtýynsha, bul baǵytta salyq, jer, bıýdjet kodeksterine, avtokólik joldary týraly zańǵa ózgerister engizilgen. «Bul ózgerister ınvestorlarǵa qolaıly jaǵdaılar týǵyzady. Zańdarmen qatar kólik- kommýnıkatsııa salasynda júzege asyrylatyn jobalar da erekshe», dedi Ábilǵazy Qusaıynov. Onyń aıtýynsha, Indýstrııaldy-ınnovatsııalyq baǵdarlama aıasynda 16 mıllıard dollarlyq 59 joba júzege asyrylady. Qazirgi kezde onyń 4,5 mıllıard dollarlyq 9-y iske qosylǵan. Sondaı-aq aldaǵy ýaqytta avtokólik joldaryn damytý boıynsha 6 joba júzege asady.
«Bulardyń ishindegi eń úlkeni «Batys Eýropa-Batys Qytaı» dálizi. Jalpy uzyndyǵy 8,5 myń shaqyrymdyq jobaǵa álemdik 5 qarjy ınstıtýty 3,5 mıllıard dollar bóldi. Qazirgi kezde teńiz arqyly Azııadan Eýropaǵa jylyna 700 mıllıard dollardyń taýary tasylady. Teńiz joly ýaqyt jaǵynan uzaq ári qarjylaı qymbat. Qazaqstan atalǵan dálizdi salý arqyly teńiz jolyna básekeles bola alady. Mysaly, avtokólik jolymen taýardy Azııadan Eýropaǵa 10 kúnde jetkizýge bolady. Bul arzan, ári tıimdi», dedi mınıstr.
