Qazaqstan kókparshylary álem chempıony atandy
TÚRKІSTAN. KAZINFORM – Túrkistan qalasynda ótken kókpardan álem chempıonaty máresine jetti. Fınaldyq kezdesýde Qazaqstan quramasy Ózbekstan komandasyn 9:2 esebimen jeńip, álem chempıony atandy.
Sheshýshi oıynda qazaqstandyq kókparshylar joǵary sheberlik pen komandalyq úılesimdilik tanytyp, tartysty ótken básekede basymdyqqa ıe boldy.
Osylaısha, ulttyq quramamyz 9 jyldyq úzilisten keıin qaıta uıymdastyrylǵan álem chempıonatynda top jaryp, altyn júldeni enshiledi. Ekinshi oryn Ózbekstan komandasynyń enshisinde, al úzdik úshtikti aýǵanstandyq kókparshylar túıindedi.
Aıta keteıik, halyqaralyq dodaǵa álemniń 9 elinen komandalar qatysyp, júlde jolynda ózara myqtyny anyqtady. Olar: Aýǵanstan, Qytaı, Majarstan, Mońǵolııa, Reseı Federatsııasy, Tájikstan, Ózbekstan, Túrkııa jáne Qazaqstan.
Týrnır barysynda qazaqstandyq sportshylar barlyq kezeńde turaqty oıyn órnegin kórsetip, fınalǵa senimdi túrde jetken bolatyn.
Jarys Dúnıejúzilik Kókpar qaýymdastyǵy men Qazaqstan Respýblıkasynyń Kókpar federatsııasy qoldaýymen uıymdastyryldy.
Aıta ketsek, kókpardan álem chempıonaty sońǵy ret 2017 jyly ótken edi.
Buǵan deıin Túrkistan qalasynda ótip jatqan kókpardan álem chempıonatynyń jartylaı fınalyna joldama alǵan komandalar belgili bolǵanyn jazǵanbyz.
Sondaı-aq budan buryn Qyrǵyzstanda ótetin kóshpendiler oıyny tizimine qazaqtyń kókpary engenin habarlaǵan edik.