Qazaqstan qoqys joıýdyń ábden eskirgen ádisin qoldanady
Qazaqstanda jyl saıyn 4,5 mln tonnadan astam qatty turmystyq qaldyqtar jınalady. Bul jóninde QR Premer-Mınıstri Álıhan Smaıylov Úkimet otyrysyn ótkizdi, dep habarlaıdy QazAqparat tilshisi.
«Álemniń kóptegen elderi qaldyqtardy qaıta óńdep, ýtılızatsııa jasaýda. Tıisti ınfraqurylym jasalyp, halyqtyń qaldyqtarmen jumys isteý mádenıeti qalyptasqan. Bul Eýropa elderine qaldyqtardy óńdeý kórsetkishin 50%-ke jetkizýge múmkindik berdi. Búginde Shvetsııa turmystyq qaldyqtardyń 99%-in qaıta óńdep, paıdaǵa jaratyp otyr. Al biz áli kúnge deıin qoqysty joıýdyń jınaqtaý nemese kómý sııaqty ábden eskirgen ádisin qoldanyp kelemiz», - dedi Álıhan Smaıylov Úkimet otyrysynda.
Premer-Mınıstrdiń aıtýynsha, jyl saıyn Qazaqstanda 4,5 mln tonnadan astam qatty turmystyq qaldyqtar paıda bolady. Myńdaǵan stıhııalyq qoqys polıgondaryn joıý úshin ákimdikter qomaqty bıýdjet qarajatyn bóledi. Qaldyqtardy zańsyz tasymaldaý jáne jınaqtaý faktilerin anyqtaýǵa arnalǵan reıdtik is-sharalar júrgiziledi. Zań talaptaryn buzǵany úshin salynatyn aıyppul mólsheri de ulǵaıtyldy.
«Alaıda, atqarylyp jatqan sharalar jetkiliksiz. Qaldyqtardy basqarý salasyndaǵy qazirgi ahýal óte kúrdeli kúıinde qalyp otyr. Osy kúnge deıin zamanaýı qoqys óńdeý zaýyttary iske qosylǵan joq. Ókinishke qaraı, bizde qaldyqtarmen jumys isteý mádenıeti qalyptaspady. Kóp jaǵdaıda qoqysty kóshege tastaı salý ádetke aınalǵan. Qoqys úıindilerine qatysty aýyldardaǵy jaǵdaı budan da kúrdeli. 2022 jylǵy ǵaryshtyq monıtorıng nátıjeleri boıynsha elde 5,6 myńnan astam stıhııalyq qoqys úıindileri anyqtaldy. Bıylǵy naýryzdan qyrkúıekke deıingi aralyqta 5,5 myń ruqsat etilmegen qoqys orny tabyldy», - dedi Úkimet basshysy.
Bul rette Premer-Mınıstr ákimshilik aıyppuldar jaǵdaıdy jaqsartpaıtynyn, polıgonǵa qoqys tastaǵannan kóri aıyppul tóleý arzanyraq ekenin aıtty.
«Bul ádisti ózgertip, qaldyqtardy óńdeý men kádege jaratýdyń naqty júıesin qurý qajet. Jergilikti atqarýshy organdar tıisti aqparattyq jumys júrgizbeıdi. Mysaly, qurylys qaldyqtary polıgondary jóninde kóp adam bile bermeıdi. Qaldyqtardy bólek jınaýdy, odan ári suryptaýdy, qaıta óńdeýdi jáne kádege jaratýdy belsendi engizý qajet. Sarapshylardyń pikirinshe, Qazaqstanda qaldyqtarǵa arnalǵan polıgon uıymdastyrýdaǵy basty problema – tarıfter, talaptar men normalar bolyp otyr. Olardy ıkemdi etý kerek», - dedi Á.Smaıylov.
Buǵan deıin Ekologııa jáne tabıǵı resýrstar mınıstri Erlan Nysanbaev Qazaqstannyń qaı óńirinde qoqys úıindisi kóp ekenin baıandaǵan edi.