Qazaqstan qoǵamdyq qaýipsizdik salasyndaǵy halyqaralyq yntymaqtastyqty kúsheıtip jatyr
ASTANA. KAZINFORM — Qytaıdyń Lıanıýngan qalasynda Qoǵamdyq qaýipsizdik salasyndaǵy jahandyq yntymaqtastyq forýmynyń konferentsııasy ótti. Bul týraly QR ІІM málim etti.
Forým aıasynda transulttyq qylmys, esirtkiniń zańsyz aınalymy, kıberqylmys jáne zańsyz kóshi-qon sekildi ózekti máseleler talqylandy.
Atalǵan sharaǵa QR Іshki ister mınıstri Erjan Sadenov qatysyp, sóz sóıledi. Mınıstr elimizdiń tsıfrlyq transformatsııany strategııalyq basymdyq retinde qarastyratynyn atap ótti.
— Álem jańa tarıhı dáýirge qadam basty. Tsıfrlyq progress qarqyny artyp keledi. Jappaı tsıfrlandyrýdyń aýqymdy múmkindikterimen qatar ol qaýipsizdikke qatysty belgili bir syn-qaterlerdi de týdyrady. Polıtsııa tájirıbesin ınnovatsııalyq tehnologııalarmen ushtastyra otyryp, bul qaýipterge tıisti deńgeıde tótep bere alatynymyzǵa senimdimin, — dedi mınıstr.
Qazaqstan tarapy BUU-nyń kıberqylmysqa qarsy konventsııasyna qosylýǵa nıetti ekenin, sondaı-aq Eýropalyq konventsııaǵa qosylý boıynsha jumysty jalǵastyratynyn jáne BUU, ShYU, TMD, Túrki memleketteri uıymy jáne basqa da qurylymdar aıasynda seriktestikti belsendi damytýdy kózdep otyrǵanyn jetkizdi.
Forým barysynda qazaqstandyq delegatsııa qoǵamdyq qaýipsizdik salasyndaǵy sońǵy jetistiktermen tanysty. Arnaıy kórmede quqyq qorǵaý organdary jumysynda tsıfrlandyrý men jasandy ıntellekt qoldanýdyń zamanaýı tehnologııalary usynyldy.
Forým aıasynda Qazaqstan Іshki ister mınıstriniń Interpoldyń Bas hatshysy V.Ýrkızamen, Qytaıdyń qoǵamdyq qaýipsizdik mınıstrimen, Grýzııa men Mońǵolııanyń ishki ister mınıstrlerimen, Belarýs tergeý komıtetiniń tóraǵasymen jáne Huawei kompanııasynyń basshylyǵymen ekijaqty kezdesýleri ótti.
Kelissózder barysynda ózara is-qımyl perspektıvalary, tájirıbe almasý jáne qoǵamdyq qaýipsizdik salasyna ınnovatsııalyq tehnologııalardy engizý máseleleri qaraldy.
Barlyq kezdesýler ózara túsinistik jáne konstrýktıvti formatta ótip, qaýipsizdik salasyndaǵy yntymaqtastyqty kúsheıtýge jáne birlesken bastamalardy iske asyrýǵa taraptardyń múddeliligin rastady.
Buǵan deıin, qoǵamdyq qaýipsizdik salasyn barynsha tsıfrlandyrý jemqorlyqty azaıtatynyn jazdyq.