Qazaqstan qoǵamdyq qaýipsizdik deńgeıi boıynsha álemdegi úzdik 50 eldiń qataryna endi
ASTANA. KAZINFORM — Qazaqstan qoǵamdyq tártip pen qaýipsizdik deńgeıi boıynsha 143 el men aýmaqtyń ishinde 41-orynǵa ıe boldy. Bul týraly derekter World Justice Project (WJP) halyqaralyq uıymynyń 2026 jylǵy zertteýinde jarııalandy.
Sońǵy tórt jylda elimiz osy kórsetkish boıynsha reıtıngtegi ornyn birtindep jaqsartyp keledi. 2023 jyly respýblıka 44-orynda bolsa, 2024 jyly 43-orynǵa, 2025 jyly 42-orynǵa kóterildi. Al bıyl 41-satyǵa jaıǵasty.
Zertteýde qandaı kórsetkishter eskerildi
Qoǵamdyq tártip pen qaýipsizdik kórsetkishi halyqtyń qylmystan, terrorızm qaýpinen, qarýly qaqtyǵystardan jáne saıası zorlyq-zombylyqtan qorǵalý deńgeıin qamtıdy. Sonymen qatar elde jeke tulǵalar arasyndaǵy janjaldardy sheshý kezinde kúsh qoldaný jaǵdaılary qanshalyqty jıi bolatynyna da nazar aýdarylady.
Bul baǵyt boıynsha Qazaqstan Frantsııa, Italııa, Portýgalııa, Grýzııa, Túrkııa jáne Reseı sııaqty birqatar Eýropa men Azııa elderinen joǵary nátıje kórsetken.
Quqyq ústemdigi ındeksindegi Qazaqstannyń orny
Qoǵamdyq qaýipsizdik kórsetkishi World Justice Project uıymynyń Quqyq ústemdigi ındeksine kiretin segiz baǵyttyń biri sanalady.
Zertteý aıasynda qaýipsizdikten bólek, azamattardyń negizgi quqyqtarynyń saqtalýy, sybaılas jemqorlyqqa qarsy is-qımyl, memlekettik organdardyń ashyqtyǵy, sot júıesiniń jumysy jáne zań talaptarynyń oryndalýy baǵalanady.
Jalpy reıtıngte Qazaqstan 143 el men aýmaqtyń arasynda 67-orynǵa turaqtady.
Zertteý halyq pen tıisti sala mamandary arasynda júrgizilgen saýalnamalarǵa negizdelgen. Baǵalaý 44 kórsetkish boıynsha qalyptasty.
2026 jylǵy Quqyq ústemdigi ındeksinde Danııa birinshi orynǵa shyqty. Odan keıin tizimde Norvegııa, Fınlıandııa, Shvetsııa jáne Lıýksembýrg tur.
Aıta keteıik, buǵan deıin Qazaqstan Ortalyq Azııada avıatsııalyq qaýipsizdik boıynsha kósh bastap turǵanyn jazǵanbyz.
