Qazaqstan klımaty jahandyq jylymyqqa qaraǵanda eki ese tez jylyp keledi
NUR-SULTAN. QazAqparat – 2019 jyl – ǵalamshardaǵy meteobaqylaý júrgizýdiń búkil tarıhynda eń jyly onjyldyqtaǵy ekinshi jyl boldy. Kóptegen klımatologtardyń pikirinshe, ortashajyldyq temperatýranyń kóterilýine atmosferadaǵy kómirqyshqyl jáne basqa da parnıktik gazdar quramynyń artýy áser etip otyr, dep habarlaıdy QazAqparat Energyprom.kz saıtyna silteme jasap.
Parnıktik gazdar, jáne eń aldymen kómirqyshqyl gaz ǵalamshardaǵy birkelki klımatty qalyptastyrady: olarsyz ortasha aýa temperatýrasy -18 C bolatyn edi. Qazbaly otyndy (kómir, munaı jáne gaz) jaǵýdan aýada kómirqyshqyl gaz kólemi aıtarlyqtaı artyp, klımattyń jylynýyna sebep bolady.
Ǵalamshar tarıhyna tán klımattyń ózgerýi men túrli klımattyq kezeńderge qaramastan, qazirgi kezde baqylanyp otyrǵan ortasha temperatýra ósimi jyldamdyǵy sońǵy 2 mıllıon jyl barysynda bolǵan emes, dep habarlandy aǵymdaǵy jyldyń 28 qazanynda ótken Green webinar (IGTIPC.ORG) atty klımat boıynsha ashyq vebınarda.
Klımattyń jylynýy uzaq kezeńderge sozylǵanymen qazirgi kezde baqylanyp otyrǵan aýa temperatýrasynyń kúrt kóterilýi sońǵy elý jylda aıqyn baıqalyp otyr.
Bul rette 2016 jyly Qazaqstan parnıktik gazdardyń shyǵarylýyn 2030 jylǵa qaraı qysqartýǵa jáne jahandyq temperatýra ósimin 2oC tómen ustap turýǵa baǵyttalǵan klımat boıynsha Parıj kelisimin bekitken.
Qazaqstan úshin halyqaralyq klımattyq kelisimderdi iske asyrý óte mańyzdy, sebebi «Qazgıdromet» RMK málimetinshe, sońǵy otyz jyldyń ishinde Qazaqstandaǵy klımat álem boıynsha ortasha kórsetkishten eki esedeı jylynǵan.
