Qazaqstan KQK arqyly munaı tasymaldaǵan azamattyq kemelerge jasalǵan shabýyldy qatań aıyptady
ASTANA. KAZINFORM – QR Syrtqy ister mınıstrligi 17 jáne 19 shildede Qara teńiz akvatorııasynda Kaspıı qubyr konsortsıýmynyń (KQK) ınfraqurylymy arqyly munaı tasymaldaǵan azamattyq kemelerge ushqyshsyz ushý apparattarymen jasalǵan shabýyldardy qatań aıyptady. Bul týraly QR SІM málimdedi.
Mınıstrliktiń málimdeýinshe, mundaı áreketter Qazaqstannyń ekonomıkalyq múddelerine jol berýge bolmaıtyn qol suǵýshylyq bolyp sanalady. Sondaı-aq olar zańdy halyqaralyq saýdany, jahandyq energetıkalyq naryqtardy jáne halyqaralyq kólik-logıstıkalyq jetkizý tizbekteriniń qaýipsizdigin turaqsyzdandyrýǵa baǵyttalǵan qasaqana áreketter retinde baǵalanady.
– Qara teńiz akvatorııasyna KQK termınaldarynda munaı tıeý maqsatynda kiretin azamattyq kemeler týraly aqparat almasýdyń barlyq múddeli taraptar buryn kelisken tetiginiń ádeıi eskerilmegeni erekshe alańdaýshylyq týǵyzady. Bul azamattyq kemeler ekıpajdarynyń ómiri men qaýipsizdigine qater tóndirdi, – delingen mınıstrlik málimdemesinde.
Qazaqstan shabýyldardy dereý toqtatýdy jáne qazaqstandyq kómirsýtek shıkizaty eksporttalatyn ınfraqurylymnyń qaýipsizdigin qamtamasyz etý úshin jan-jaqty sharalar qabyldaýdy talap etti.
Syrtqy ister mınıstrligi seriktes memleketterdi atalǵan shabýyldardy batyl aıyptaýǵa shaqyryp, barlyq múddeli taraptardy osyndaı oqıǵalardyń aldyn alýǵa baǵyttalǵan naqty praktıkalyq sharalardy birlesip ázirleýge úndedi.
– Qazirgi ýaqytta Qazaqstan Respýblıkasy keltirilgen zalalǵa jan-jaqty baǵalaý júrgizýde. Onyń qorytyndysy boıynsha Qazaqstan óziniń zańdy múddelerin qorǵaý úshin halyqaralyq quqyqta kózdelgen barlyq tetikterdi, onyń ishinde keltirilgen zalaldy óteý týraly talaptar qoıý quqyǵyn ózine qaldyrady, – dep atap ótti vedomstvo.
Mınıstrlik Qazaqstan qaqtyǵystardy beıbit jolmen retteýdiń balamasy joq ekenin taǵy da málimdep, halyqaralyq quqyq qaǵıdattaryna, keme qatynasy erkindigine jáne halyqaralyq kólik-logıstıkalyq ári energetıkalyq baǵyttardyń senimdi jumys isteýin qamtamasyz etýge beıildi ekenin rastady.
Aıta keteıik, buǵan deıin Kaspıı qubyr konsortsıýmynyń teńiz termınalynda Qazaqstan munaıyn tıep jatqan eki tankerge ushqyshsyz ushý apparattarymen shabýyl jasalǵan bolatyn.
