Qazaqstan Qytaımen ıadrolyq qaýipsizdik jáne kadr daıarlaý baǵytynda yntymaqtastyqty kúsheıtpek
ASTANA. KAZINFORM — Qazaqstan Respýblıkasy Atom energııasy jónindegi agenttiginiń tóraǵasy Almasadam Sátqalıev Qytaı Halyq Respýblıkasynyń atom salasyndaǵy negizgi memlekettik organdary men jetekshi uıymdarynyń basshylarymen birqatar ekijaqty kezdesýler ótkizdi.
Atap aıtqanda, QHR Memlekettik energetıka isteri basqarmasynyń (NEA) basshysy Van Hýnchjımen, Qytaıdyń Atom energııasy agenttiginiń (CAEA) tóraǵasy Shan Chjýndemen, sondaı-aq Qytaı ulttyq ıadrolyq korporatsııasy (CNNC) basqarma tóraǵasy Shen ıAnfenmen kelissózder ótti.
Kezdesýler barysynda birlesken bastamalardy iske asyrý, óndiristik kooperatsııany damytý, sondaı-aq eki eldiń salalyq memlekettik organdary men atom ónerkásibi uıymdary arasyndaǵy ózara is-qımyldy odan ári nyǵaıtý máseleleri qarastyryldy.
Kelissózder barysynda atom salasyn memlekettik retteý, ıadrolyq jáne radıatsııalyq qaýipsizdikti qamtamasyz etý, normatıvtik-quqyqtyq bazany jetildirý, kadrlar daıarlaý jáne ǵylymı-tehnıkalyq yntymaqtastyqty keńeıtý máselelerine erekshe nazar aýdaryldy.
Kelissózder qorytyndysy boıynsha taraptar qol jetkizilgen ýaǵdalastyqtardy dáıekti túrde iske asyrýǵa jáne atom salasyndaǵy yntymaqtastyqtyń negizgi baǵyttary boıynsha birlesken jumys tetikteriniń qyzmetin jandandyrýǵa daıyn ekendikterin rastady.
Aıta ketelik Qytaı Halyq Respýblıkasyna jumys sapary aıasynda Qazaqstan Respýblıkasynyń delegatsııasy Qazaqstan Respýblıkasy Atom energııasy agenttiginiń tóraǵasy Almasadam Sátqalıevtiń basshylyǵymen ýran óndirý jáne ıadrolyq otyn óndirý salasynda qyzmet atqaratyn CNNC korporatsııasynyń óndiristik nysandarynda bolǵan edi.
