Qazaqstan Qytaımen úshinshi temirjol ótkelin ashpaq: jańa baǵyt jylyna 20 mln tonna júk ótkizedi
ASTANA. KAZINFORM — Qazaqstan men Qytaı arasyndaǵy úshinshi temirjol shekara ótkelin ashatyn Baqty – Aıagóz jelisiniń qurylysy 93%-ǵa aıaqtaldy. Uzyndyǵy 303 shaqyrym bolatyn jańa baǵytty 2027 jyly iske qosý josparlanǵan. Joba jylyna 20 mln tonnaǵa deıin júk tasymaldaýǵa múmkindik beredi. Bul týraly Kólik mınıstrligi málim etti.
Vedomstvonyń málimetinshe, uzyndyǵy 303 shaqyrymdy quraıtyn Baqty – Aıagóz temirjol jelisiniń qurylysy bekitilgen kestege sáıkes jalǵasýda. Temirjol jelisindegi jumystardy aıaqtap, nysandy paıdalanýǵa berý 2027 jylǵa josparlanǵan.
Búginde joba aıasynda kózdelgen 39,5 mln tekshe metr jer tóseminiń 36,8 mln tekshe metri tóseldi. Bul jalpy kólemniń 93%-yn quraıdy. Qalǵan jumystardyń negizgi bóligi shekara mańy aımaǵynda jáne Baqty stantsııasy aýdanynda shoǵyrlanǵan.
Qazirgi ýaqytta joldyń joǵarǵy qabatyn tegisteý jáne joldyń joǵarǵy qurylysyn tóseý aldynda topyraqtyń tyǵyzdalý sapasyn tekserý jumystary júrgizilýde. Sonymen qatar jasandy qurylystar salý jumystary jalǵasýda. Atap aıtqanda, 267 sý ótkizý qubyrynyń 245-i salyndy, 19 mal ótkeliniń 12-si daıyn. Al 47 kópirdiń 43-inde qurylys jumystary júrgizilip jatyr.
Daıyndaý jáne jetkizý merzimderin qysqartý maqsatynda kópir arqalyqtary tikeleı qurylys alańynda óndiriledi. Bul rette olardy sertıfıkattaý jáne qurylys normalary men qaǵıdalarynyń (QNjE) talaptaryna sáıkes sapasyn baqylaý júzege asyrylady.
Joldyń joǵarǵy qurylysyn salýǵa qajetti materıaldar otandyq óndirýshilerden satyp alynýda. Relsterdi Aqtóbe rels-arqalyq zaýyty jetkizedi. Shpaldar men bekitkishterdi «RWS Binding», «Innotrack», «Fasteners 2metall (BENT)» JShS-leri jáne «Magnetık» JShS qamtamasyz etedi.
Baǵyttamalyq burmalardy «Prommashkomplekt» JShS jetkizedi. Aıagóz stantsııasy aýdanynda qurylys materıaldaryn qabyldaý jáne bólý jumystary uıymdastyrylǵan.
Jobany iske asyrý Qazaqstannyń kólik-logıstıkalyq áleýetin damytý jáne Qytaımen temirjol qatynasyn keńeıtý úshin strategııalyq mańyzǵa ıe.
Qurylystyń negizgi nátıjeleriniń biri Qazaqstan men Qytaı arasyndaǵy úshinshi temirjol shekara ótkeliniń ashylýy bolmaq. Jańa baǵyt qoldanystaǵy Dostyq jáne Altynkól ótkizý pýnktterine túsetin júktemeni azaıtýǵa, júk aǵyndaryn bólýdiń tıimdiligin arttyrýǵa jáne tasymal kólemin ulǵaıtýǵa qosymsha múmkindik jasaýǵa jol ashady.
Jańa baǵyttyń ótkizý qabileti jylyna 20 mln tonnaǵa deıin júkti quraıdy dep kútilýde. Temirjol jelisiniń iske qosylýy elimizdiń eksporttyq múmkindikterin keńeıtýge, otandyq ónimderdi Qytaı naryǵyna jetkizý kólemin arttyrýǵa, qosymsha tranzıttik júk aǵyndaryn tartýǵa, sondaı-aq Qazaqstan men Qytaı arasyndaǵy saýda-ekonomıkalyq yntymaqtastyqty nyǵaıtýǵa múmkindik beredi.
Aıta keteıik, buǵan deıin Qazaqstan men Qytaı arasyndaǵy temirjol arqyly júk tasymalynyń kólemi 8%-ǵa artqanyn jazdyq.