Qazaqstan Qytaımen birlesip, eksportqa shyǵatyn aýyl sharýashylyǵy ónimderiniń kólemin ulǵaıtpaq

ASTANA. KAZINFORM – Bıylǵy qyrkúıek aıynyń 9 - 14 aralyǵynda Qazaqstanǵa Qytaı Halyq Respýblıkasynyń Bas keden basqarmasynyń delegatsııasy jumys saparymen keldi, dep habarlaıdy QR Aýyl sharýashylyǵy mınıstrliginiń baspasóz qyzmeti.

QR Aýyl sharýashylyǵy mınıstrliginiń Veterınarııalyq baqylaý jáne qadaǵalaý komıtetimen birlese uıymdastyrylǵan bul sapar qazaqstandyq mal sharýashylyǵy ónimderiniń Qytaı naryǵyna qoljetimdiligin keńeıtýge baǵyttalǵan.

Inspektsııalyq sapar aıasynda mamandar Soltústik Qazaqstan, Aqmola jáne Almaty oblystaryndaǵy birqatar et óńdeý jáne qus sharýashylyǵy kásiporyndaryn aralap kórdi. Ásirese, tehnologııalyq úderisterge, bıologııalyq qaýipsizdik standarttarynyń saqtalýyna, veterınarııalyq jáne zerthanalyq baqylaý júıesine, sondaı-aq ónimdi saqtaý men tasymaldaý jaǵdaılaryna aıryqsha kóńil bólindi.

Osy oraıda Almaty qalasynda Qytaıdyń eksportqa shyǵýǵa múddeli kásiporyndardy tirkeýge arnalǵan aqparattyq platformasy- CIFER júıesi boıynsha semınar uıymdastyryldy. Qatysýshylar eksportqa baǵyttalǵan kásiporyndarǵa qoıylatyn talaptardy, sondaı-aq ótinimderdi berý men qaraý tártibin talqylady. Delegatsııa sonymen qatar Respýblıkalyq veterınarııalyq zerthananyń jáne qalalyq aýmaqtyq Veterınarııalyq baqylaý jáne qadaǵalaý komıteti ınspektsııasynyń jumysymen tanysty.

Sapar qorytyndysy boıynsha QHR Bas keden basqarmasy jańa qazaqstandyq kásiporyndardy Qytaı naryǵyna ónim jetkizýshilerdiń maquldanǵan tizimine engizýge negiz bolatyn resmı qorytyndy daıyndaıdy.

Bul otandyq óndirýshiler úshin qosymsha eksporttyq múmkindikter ashyp, agrarlyq sektordyń odan ári damýyna jáne Qazaqstannyń syrtqy saýda áleýetiniń artýyna yqpal etedi.

Osyǵan deıin qazaqstandyq aýyl sharýashylyǵy ónimderi 70-ten astam elge eksporttalatyny týraly jazdyq.