Qazaqstan Qytaımen birge JI tehnıkalyq parkin salýǵa múddeli – Astana sammıti
ASTANA. KAZINFORM – Qazaqstan Qytaımen jasandy ıntellekt, bıotehnologııa, kvanttyq esepteý salalarynda birlesken jobalardy iske asyrýǵa múddeli. Táýelsizdik saraıyndaǵy «Ortalyq Azııa-Qytaı» sammıtinde Prezıdent Qasym-Jomart Toqaev osyndaı málimet aıtty.
- Biz qytaılyq kompanııalarǵa Qazaqstannyń birqatar óńirinde jel generatorlary men energııa jınaqtaý júıelerin óndirý, jel jáne kún elektr stantsııalaryn salý baǵytyndaǵy jobalardy iske asyrǵany úshin alǵys aıtamyz. Tsıfrlyq transformatsııadaǵy tehnologııalyq yntymaqtastyq pen iskerlik baılanystardy kúsheıtý bizdiń strategııalyq áriptestigimizdi jańa mazmunmen tolyqtyrady. Bul Qazaqstannyń jáne búkil aımaqtyń ekonomıkalyq damýyna qosymsha serpin beredi desem qatelespeımin, - dedi Memleket basshysy.
Qasym-Jomart Toqaev Qytaıdyń joǵary tehnologııaǵa negizdelgen ǵylymı jobalardaǵy áleýeti zor ekenin atap ótti.
- Qytaıdyń kosmonavtıka men kvanttyq tehnologııany, 6G-di damytýdaǵy qomaqty jetistikteri onyń jahandyq deńgeıdegi tehnologııalyq derjava ekenin rastady. Sondyqtan Qazaqstan jasandy ıntellekt, bıotehnologııa, kvanttyq esepteýler salasyndaǵy birlesken jobalardy iske asyrýǵa, sondaı-aq zertteý ortalyqtary men tehnoparkter qurýǵa múddeli, - dedi Prezıdent.
Aıta keteıik, elordada «Ortalyq Azııa – Qytaı» ІІ sammıti ótip jatyr.
Іs-sharaǵa Memleket basshysy Qasym-Jomart Toqaev, QHR tóraǵasy Sı Tszınpın, Ózbekstan Prezıdenti Shavkat Mırzıeev, Qyrǵyzstan Prezıdenti Sadyr Japarov, Túrikmenstan Prezıdenti Serdar Berdimuhamedov jáne Tájikstan Prezıdenti Emomalı Rahmon qatysyp otyr.
«Ortalyq Azııa - Qytaı» І sammıti 2023 jyldyń 19 mamyrynda Qytaıdyń Sıan qalasynda ótken edi.