Qazaqstan Qytaımen áýe reısteriniń sanyn arttyrmaq
ASTANA. KAZINFORM – Qazaqstan Qytaımen jáne Ózbekstanmen áýe qatynasyn keńeıtip, jańa baǵyttar ashýdy jáne reıster sanyn kóbeıtýdi josparlap otyr. Bul týraly QR Kólik mınıstrligi Azamattyq avıatsııa komıtetiniń tóraǵasy Saltanat Tompıeva elordada «Ortalyq Azııa + Qytaı» avıatsııa máseleleri jónindegi yntymaqtastyq jumys tobynyń konferentsııasynda aıtty.
Onyń aıtýynsha, 14 tamyz kúni Qytaı jáne Ózbekstannyń avıatsııa basshylarymen ekijaqty kelissózder ótedi.
– Biz jańa pýnktter ashyp, tasymaldaýshylarymyzǵa jańa múmkindikter usynǵymyz keledi. Josparymyzda reıster jıiligin arttyrýmen qatar ushý geografııasyn keńeıtý de bar, – dep atap ótti S. Tompıeva.
Óz sózinde komıtet tóraǵasy Qazaqstan men Qytaıdyń avıatsııa basshylyǵy arasynda «ashyq aspan» rejımi týraly kelisimge qol qoıylǵanyn eske saldy. Bul reıster sanyn eki esege deıin arttyrýǵa múmkindik berdi. Osy kelisim aıasynda jańa baǵyttar men jańa tasymaldaýshylar qosylǵan.
Sondaı-aq avıatsııa salasyna ınvestıtsııa tartý sharalary, sonyń ishinde áýehabtar salý máselesi talqylanýda.
– Qazaqstannyń geografııalyq ornalasýy óte utymdy, al júk áýe tasymalyn damytý jahandyq avıatsııa kartasyndaǵy pozıtsııamyzdy nyǵaıtýǵa kómektesedi, – dep tolyqtyrdy S. Tompıeva.
Aıta keteıik, «Ortalyq Azııa – Qytaı» (C5+1) bastamasy aıasynda azamattyq avıatsııa salasyndaǵy yntymaqtastyq jónindegi jumys tobynyń ekinshi konferentsııasy Qazaqstan astanasynda ótip jatyr. Oǵan Qazaqstan, Qyrǵyzstan, Tájikstan, Túrikmenstan, Ózbekstan jáne Qytaı Halyq Respýblıkasynyń avıatsııa basshylary, azamattyq avıatsııa jáne aeronavıgatsııa qyzmetteriniń ókilderi jınaldy.
Jıynda ushý qaýipsizdigin qamtamasyz etý, kólik-tranzıttik ıntegratsııany damytý, avıatsııa mamandarynyń biliktiligin arttyrý, Qytaı men Ortalyq Azııa elderi arasyndaǵy halyqaralyq áýe baǵyttary jelisin keńeıtý, jańa tehnologııalardy engizý, ekologııalyq turaqty avıatsııany damytý, sondaı-aq 2024 jyly Qazaqstan bastamasymen qurylǵan Eýrazııalyq azamattyq avıatsııa konferentsııasyna (EACAC) múshe elderdiń yntymaqtastyǵy talqylanady. Bul uıym Ortalyq Azııa memleketteriniń ICAO, Eýropalyq komıssııa, IATA jáne basqa da halyqaralyq uıymdarmen birlesken jumysynda biryńǵaı ustanymyn qalyptastyrýǵa baǵyttalǵan.
Byltyr «Ortalyq Azııa – Qytaı» (C5+1) azamattyq avıatsııa salasyndaǵy yntymaqtastyq jumys tobynyń birinshi konferentsııasy Qytaıdyń Sıan qalasynda ótken edi.
Aıta keteıik, Almaty áýejaıy Qytaıdan jańa baǵyt boıynsha alǵashqy reısti qabyldady.