Qazaqstan qytaılyq týrıster arasynda tanymal elder tiziminde 29-orynǵa kóterildi
ASTANA. KAZINFORM – Qazaqstan qytaılyq týrıster arasynda tanymal elder tiziminde 29-orynǵa kóterildi. Bul týraly Ortalyq kommýnıkatsııalar qyzmetindegi brıfıngte Týrızm jáne sport mınıstrligi Týrızm ındýstrııasy komıtetiniń tóraǵasy Nurtas Káripbaev aıtty.
- Memleket basshysy Qasym-Jomart Toqaevtyń Qytaıǵa resmı sapary barysynda 2024 jyl «Qytaıdaǵy Qazaqstan týrızmi jyly» bolyp jarııalanǵan bolatyn. Týrızm jyly aıasyndaǵy is-sharalar saıahatshylarǵa jańa múmkindik berdi. Sondaı-aq týrızm ındýstrııasy ókilderine seriktestik baılanystardy nyǵaıtýǵa jol ashty. Týrızm jylynyń negizgi maqsaty – Qazaqstandy Qytaı azamattary úshin týrıstik destınatsııa retinde tanymal etý. Sondaı-aq mádenı jáne iskerlik tájirıbe almasý, halyqtar arasyndaǵy ózara túsinistik pen dostyqty nyǵaıtý. Týrızm jyly Qytaıdan jarty mıllıon týrıst tartýǵa jáne 300 mln AQSh dollary kólemindegi týrıstik qyzmetterdi eksporttaýǵa baǵyttaldy, - dedi komıtet tóraǵasy.
Onyń atap ótýinshe, mınıstrlik Týrızm jylynyń biryńǵaı josparyn bekitti. Jospar birneshe baǵytty qamtıtyn is-sharalardan turdy. Jyl ishinde marketıngtik quraldardy paıdalaný, onyń ishinde túrli kezdesýler, iskerlik jáne mádenı is-sharalar ótkizý arqyly 37 is-shara uıymdastyryldy. Bulardyń bári Qytaı naryǵynda Qazaqstannyń tanymaldylyǵyn arttyrýǵa baǵyttalǵan.
- Іs-sharalardyń barlyǵy Qytaıdyń jetekshi týrıstik kompanııalarymen iskerlik baılanystardy nyǵaıtýǵa arnaldy. Osylaısha, istelgen jumystardyń nátıjesinde brondalǵan saparlar sany boıynsha Qazaqstan qytaılyq týrıster arasynda tanymal elder tiziminde 40-tan 29-orynǵa kóterildi, - dedi Nurtas Káripbaev.
Buǵan deıin Qytaıdaǵy Qazaqstan týrızmi jyly ishki týrızmge qandaı serpin bergenin jazǵan edik.