Rýslan Jeldibaı Ekinshi Ortalyq Azııa medıaforýmyna qatysýǵa kelgen medıa ókilderimen kezdesti
ASTANA. KAZINFORM – Bul týraly QR Prezıdentiniń keńesshisi – Baspasóz hatshysy Rýslan Jeldibaı óziniń Telegram arnasynda jazdy.
— Erteń Astanada Ekinshi Ortalyq Azııa medıaforýmy bastalady. Al búgin osy forýmǵa qatysý úshin kelgen Qytaıdyń CGTN medıakorporatsııasynyń jáne habar taratý jaǵynan álemde kóshbasshy sanalatyn Al Jazeera halyqaralyq telekompanııasynyń basshylarymen kezdestim, — dep jazdy ol.
Baspasóz hatshysynyń habarlaýynsha, CGTN bas redaktorynyń orynbasary Dın ıÝnmen medıa saladaǵy yntymaqtastyq perspektıvasy talqylandy. Atap aıtqanda, Qytaı men Qazaqstan arasyndaǵy dostyq qarym-qatynas pen strategııalyq seriktestiktiń damý qarqynyn keńirek nasıhattaý máselesine aıryqsha mán berildi.
— Biz óz tarapymyzdan birlesken telejobany iske qosýdy usyndyq. Mundaı bastama eki el halqynyń ózara mádenı baılanystaryn jandandyrýǵa septigin tıgizer edi. Al, Al Jazeera medıa ınstıtýtynyń dırektory Iman Ál Amrımen jáne Al Jazeera English telearnasynyń basqarýshy dırektory Issa Álımen bolǵan kezdesýde jýrnalıster men basqa da salalyq mamandardy daıarlaý, sondaı-aq Qazaqstannyń tarıhy, tumsa tabıǵaty jáne qazirgi damýy jóninde syr shertetin derekti serııalar túsirý týraly aqyldastyq. Eske sala keteıin, Qasym-Jomart Toqaevtyń byltyr Qatar eline jasaǵan memlekettik sapary aıasynda Qazaqstan Respýblıkasy Prezıdentiniń teleradıokesheni «Ál-Jazıramen» yntymaqtastyq týraly memorandýmǵa qol qoıǵan. Kezdesýde Qazaqstanda Al Jazeera arnasynyń tilshiler qosynyn ashý máselesin de kóterdik. Medıakorporatsııa elimizde óz tilshilerin ustasa, Qazaqstan jáne Ortalyq Azııa óńirindegi eleýli oqıǵalar týraly qyzyqty aqparat taratý múmkindigi keńeıedi dep sanaımyn, — dedi Rýslan Jeldibaı.
