Qazaqstan Qytaıǵa tazartylmaǵan kúnbaǵys maıyn jetkizedi
ASTANA. KAZINFORM — Daıyn ónimdi satyp alýshy QHR astyq rezervterin qalyptastyrýǵa jaýapty Sinograin memlekettik kompanııasynyń tapsyrysy boıynsha qytaılyq CITIS Construction Co Ltd. korporatsııasy bolmaq. Bul týraly AShM málim etti.
Ýaǵdalastyq qazaqstandyq kásiporyn bazasynda kúnbaǵys tuqymyn qaıta óńdeýdi jáne odan ári Aspan asty eline maı jiberýdi kózdeıdi.
Jetkizý ótken jyly Azyq-túlik kelisimshart korporatsııasy fermerler men óńdeýshilerdi memlekettik qoldaý quraly retinde iske qosqan aýyl sharýashylyǵy ónimderiniń eksporttyq partııalaryn shoǵyrlandyrý baǵdarlamasy sheńberinde júzege asyrylady. Onyń máni: operator ár túrli jetkizýshilerden shaǵyn kólemdi ónimdi tolyqqandy eksporttyq partııalarǵa biriktiredi jáne sheteldik tutynýshylarǵa jóneltýdi qamtamasyz etedi. Bul rette korporatsııa tasymaldaýdy tolyq súıemeldeıdi. 2024 jyly shoǵyrlandyrý jobasy boıynsha Qytaı men Ortalyq Azııaǵa jalpy quny 20 mln dollardy quraıtyn dándi jáne maıly daqyldardy jetkizýge 6 eksporttyq kelisimshart jasaldy. Bıylǵy jyly Azyq-túlik kelisimshart korporatsııasy jumysyn jalǵastyrdy, sonyń nátıjesinde QHR-na qazaqstandyq óndiristiń 1,6 myń tonna jemdik un jóneltildi.
Daıyn qazaqstandyq ónimniń sheteldik naryqtarǵa shyǵýyna salalyq mınıstrliktiń, Azyq-túlik kelisimshart korporatsııasynyń jáne halyqaralyq áriptesterdiń birlesken kúsh-jigeri yqpal etedi. Kelisimshart Astana men Beıjińde agrobıznestiń qatysýymen ótken ekijaqty kezdesýler nátıjeleriniń biri boldy. Qytaılyq ınvestorlarmen jáne beıindi kompanııalarmen belsendi dıalogty Azyq-túlik kelisimshart korporatsııasynyń QHR-daǵy ókildigi turaqty negizde júrgizedi.
Búginede Qazaqstannyń agrarlyq saıasatynyń basty baǵyty tereń óńdeýge bet burýda. Shoǵyrlandyrý baǵdarlamasy jáne úshjaqty forvardtyq satyp alý sııaqty jobalardyń kómegimen korporatsııa otandyq óndirýshilerge syrtqy naryqtarǵa shyǵýǵa kómektesedi, sondaı-aq óńirlerde qaıta óńdeý qýattaryn júkteýdi yntalandyrady. Bul el ishinde qosymsha qun qurýǵa jáne shaǵyn jáne orta fermerlerge qoldaý kórsetýge múmkindik beredi.
Eske sala keteıik, buǵan deıin 8,7 mln tonna dándi daqyl eksporttalǵanyn jazǵan edik.