Qazaqstan Qytaıǵa sapaly otandyq ónimder eksportyn ulǵaıtpaq
ASTANA. KAZINFORM – Bul týraly QR Qytaı Halyq Respýblıkasyndaǵy Elshisi Shahrat Nuryshevtyń QHR Kommertsııa mınıstriniń orynbasary Lın Tszımen kezdesýi barysynda aıtaldy.
QR Syrtqy ister mınıstrliginiń bapasóz qyzmeti taratqan málimetterge qaraǵanda, taraptar strategııalyq áriptestiktiń joǵarǵy deńgeıin rastap, ózara saýdanyń turaqty oń dınamıkasyn atap ótti: 2025 jyldyń qorytyndysy boıynsha Qazaqstan men Qytaı arasyndaǵy taýar aınalymy rekordtyq 48,7 mlrd. doll. jetti.
Atap aıtqanda, bıyl ótkizýge josparlanyp otyrǵan QR – QHR Yntymaqtastyq komıtetiniń saýda-ekonomıkalyq yntymaqtastyq jónindegi kishi komıtetiniń kezekti 14-shi otyrysyna sapaly daıyndyq máselesine, sondaı-aq «Qorǵas» shekara mańy halyqaralyq yntymaqtastyq ortalyǵy aıasyndaǵy ózara is-qımyldar men ınfraqurylymdyq jobalar boıynsha yntymaqtastyqqa erekshe nazar bólindi.
Sh.Nuryshev qazaq tarapynyń sapaly otandyq ónimderiniń eksportyn ulǵaıtýǵa, ózara saýdany yntalandyra alatyn birlesken jobalardy damytýǵa múddeliligin, sondaı-aq «Qytaıǵa eksport» bastamasy aıasyndaǵy is-sharalarǵa belsendi qatysýǵa daıyn ekenin atap ótti.
Sonymen qatar taraptar bıylǵa josparlanǵan birqatar birlesken saýda-ekonomıkalyq is-sharalar men qol qoıýǵa kózdelgen ekijaqty qujattardyń daıyndyq máselelerin talqylady.
Qazaqstannyń Qytaı ekonomıkasyna qalaı kirip jatqany týraly osy materıaldan bilýge bolady.
2025 jyly Qazaqstan Qytaıǵa 5 mlrd tekshe metr gaz eksporttaǵan.
Endi Qazaqstan Qytaıǵa shoshqa etin eksporttamaq.