Qazaqstan Qytaıǵa eksporttalatyn astyq kólemin 2 mln tonnaǵa jetkizýge daıyn
ASTANA. KAZINFORM – Qazaqstan Qytaıǵa eksporttalatyn astyq kólemin 2 mln tonnaǵa jetkizýge daıyn. Bul týraly Qytaı Halyq Respýblıkasynyń Tóraǵasy Sı Tszınpınmen kelissózderden keıingi baspasózge arnalǵan málimdeme barysynda Memleket basshysy Qasym-Jomart Toqaev aıtty.
«Biz aýyl sharýashylyǵy salasyndaǵy yntymaqtastyqty jandandyrý máselesin talqyladyq. Bul salada tabysty júzege asqan birlesken jobalar bar. Eginshilikte smart júıesin qoldanýǵa, sý resýrstaryn utymdy paıdalanýǵa jáne aýyl sharýashylyǵy ónimderin tereń óńdeýge aıryqsha nazar aýdarylady. Osy oraıda qytaıdyń tájirıbesi men tehnologııalaryn qoldanýǵa, naqty ınvestıtsııalyq jobalardy birlese júzege asyrýǵa múddelimiz», - dedi Qasym-Jomart Toqaev.
Memleket basshysy byltyr Qazaqstannyń Qytaıǵa eksporttaǵan aýyl sharýashylyǵy taýarlary 2 ese ósip, 1 mlrd dollarǵa jetkenin aıtty.
«Qytaı naryǵyna sapaly ári tabıǵı et ónimderin, maıly jáne dándi daqyldar eksportyn ulǵaıtýǵa múddeli ekenimizdi atap óttik. Bul rette Qazaqstan astyǵyn 2 mln tonnaǵa jetkizýge daıynbyz. Osy saladaǵy yqpaldastyqty keńeıtý sharalaryn qoldaǵanyńyz úshin Tóraǵa Sı Tszınpın myrzaǵa rızashylyǵymdy bildiremin», - dedi Qazaqstan Prezıdenti.
