Qazaqstan Qytaıǵa alǵashqy pılottyq partııamen 20 tonna taýar jóneltti
ASTANA.KAZINFORM — Premer-mınıstrdiń orynbasary – ulttyq ekonomıka mınıstri Serik Jumanǵarın Úrimshide XI «Qytaı – Eýrazııa» kórmesi sheńberinde ótken «Qytaıǵa eksport: Qazaqstan» arnaıy sessııasynda sóz sóıledi. Bul týraly Úkimettiń baspasóz qyzmeti habarlady.
«Ortaq úlken naryq – Qytaıǵa eksport» bastamasyn alǵash ret QHR Memlekettik keńesiniń premer-mınıstri Lı Tsıan 2025 jylǵy qarashada Qytaıdyń VIII halyqaralyq ımport kórmesinde (CIIE) usyndy. 2026 jyly Qazaqstan Ulybrıtanııa, Ispanııa, Kenııa jáne Taılandpen qatar osy bastama sheńberinde jeke ulttyq sessııa aldy.
Іs-sharany ashqan Serik Jumanǵarın Qytaı tarapyna arnaıy sessııany uıymdastyrǵany úshin alǵysyn bildirip, eki memleket basshysynyń ózara saýdany odan ári arttyrý týraly ýaǵdalastyǵyn iske asyrýdaǵy mańyzdy naqty qadam ekenin jáne Qazaqstan men Qytaı arasyndaǵy Qazaqstan-Qytaı strategııalyq áriptestiginiń joǵary deńgeıin aıqyn kórsetetinin atap ótti.
Vıtse-premer Qytaı ımporttaýshylarymen, saýda jelilerimen, jetekshi marketpleıstermen jáne logıstıkalyq operatorlarmen tikeleı baılanystardy qamtamasyz ete otyryp, qazaqstandyq óndirýshiler úshin qosymsha múmkindikter ashatyn QHR kommertsııa mınıstrliginiń «Qytaıǵa eksport» bastamasynyń erekshe mańyzdylyǵyn atap ótti.
Óz kezeginde, Qazaqstan Úkimeti saýda men ınvestıtsııa úshin qolaıly jaǵdaı jasaý boıynsha júıeli jumysty jalǵastyrýda: kólik-logıstıkalyq ınfraqurylymdy jańǵyrtyp, shekara mańyndaǵy yntymaqtastyq ortalyqtaryn damytady. Halyqaralyq kólik dálizderiniń ótkizý qabiletin dáıekti túrde arttyrady.
Sessııa barysynda Abaı oblysynyń ákimi Berik Ýálı de sóz sóılep, óńirdiń Qytaımen yntymaqtastyqty damytýdaǵy strategııalyq mańyzyn atap ótti.
Sapar sheńberinde Serik Jumanǵarın «Qaztrade» saýda saıasatyn damytý ortalyǵy» AQ-nyń Úrimshi qalasyndaǵy ókildiginiń qyzmetimen tanysty. Ol qytaı naryǵyna shyǵý kezinde qazaqstandyq kompanııalarǵa keshendi qoldaý kórsetedi.
Іske asqan nátıjeniń biri 1000-nan astam dúkendi biriktiretin «8:30» ShUAA iri saýda jelileriniń birimen ýaǵdalastyqtar boldy. Sun Planet, Delis jáne Run Planet qazaqstandyq brendteriniń ónimderin jeliniń 200-300 saýda núktelerinde pılottyq formatta ornalastyrý týraly aldyn ala ýaǵdalastyqqa qol jetkizildi.
Ókildiktiń kómegimen qytaı naryǵynda «Alan jáne Kompanııa» jáne Baysan Group kompanııalarynyń ónimderin jyljytý týraly kelisimderge qol qoıyldy. Budan basqa, kólemi 20 tonna qazaqstandyq taýarlardy Qytaıǵa alǵashqy pılottyq jetkizýdi súıemeldeý qamtamasyz etildi. Oǵan «Sultan» makarony, «Pıala» shaıy, RG Brands shyryndary jáne kondıterlik ónimder kirdi.
Aıta ketelik Qazaqstan men Qytaı 2027–2030 jyldarǵa arnalǵan jańa saýda baǵdarlamasyn ázirlep jatqany týraly jazǵan edik.
