Qazaqstan Qytaıdyń jetekshi JOO-larynyń fılıaldaryn ashý úshin qolaıly jaǵdaı jasaýǵa daıyn
ASTANA. KAZINFORM – Qazaqstan Qytaıdyń jetekshi tehnıkalyq joǵary oqý oryndarynyń fılıaldaryn ashý úshin qolaıly jaǵdaı jasaýǵa daıyn. Bul týraly Qytaıdyń Sınhýa aqparat agenttigine suhbat bergen Memleket basshysy Qasym-Jomart Toqaev aıtty.
Mádenı-gýmanıtarlyq yntymaqtastyq elderimizdiń halqy arasyndaǵy ekijatqy baılanystar men dostyqty nyǵaıtýda mańyzdy ról atqaratyndyǵy sózsiz. Dıplomatııalyq qarym-qatynas ornatylǵan sátten bastap bul baǵyt barlyq ýaqytta da belsendi boldy. Bilim berý, mádenıet, týrızm, ǵylym men tehnologııa syndy salalardaǵy ózara is-qımyl ózgerissiz joǵary qaraı damyp keledi. Osy jyldyń naýryzynda Beıjińde Qazaqstannyń Qytaıdaǵy Týrızm jylynyń ashylý rásimi ótti. Elderimiz arasyndaǵy týrıstik baılanystardy ilgeriletý bastaldy. Qytaı astanasynda rásim qarsańynda týrızm jáne ınvestıtsııalar forýmy ótip, týrıstik jármeńke de uıymdastyryldy. Onda Qazaqstannyń barlyq óńiri usynyldy. Jalpy, Týrızm jyly aıasynda QHR-dyń qalalary men ólkelerinde elimizdiń qonaqjaılyǵymen, baı mádenıetimen jáne dástúrimen tanystyrýǵa baǵyttalǵan 35-ten astam túrli is-shara ótkizý josparlanǵan. Biz Qytaımen birlesip, belgilengen qarqyndy jalǵastyrýǵa daıynbyz», - dedi Qazaqstan Prezıdenti.
Memleket basshysynyń paıymynsha, Qazaqstan men Qytaıdyń mádenı ortalyqtaryn ózara qurý elderimizdiń arasyndaǵy gýmanıtarlyq yntymaqtastyqqa qosymsha serpin beredi. Sonymen qatar Prezıdent osynaý mańyzdy tartylys núkteleri halyqtarymyzdyń arasyndaǵy berik dostyq kópirine aınalaryna senimdi ekendigin basa aıtty.
«Osy jyldyń aqpanynda D.Serikbaev atyndaǵy Shyǵys Qazaqstan tehnıkalyq ýnıversıtetiniń bazasynda qurylǵan birinshi «Lý Ban sheberhasyna» bardym. Qazaqstannyń avtomobıl ónerkásibi úshin biliktiligi joǵary tehnıkalyq jáne ınjenerlik kadrlar daıyndaýǵa arnalǵan zamanaýı zerthanalardan áser aldym. Biz elimizde mundaı zerthanalar geografııasyn keńeıtýge barynsha múddelimiz. Menińshe, bilim alǵan mamandar birlesken jobalardy tıimdi júzege asyrýǵa septigin tıgizedi. Joǵary bilim salasyndaǵy jemisti yntymaqtastyǵymyzdyń taǵy bir dáleli Almaty qalasyndaǵy Ál-Farabı atyndaǵy Qazaq ulttyq ýnıversıtetiniń bazasynda Soltústik Batys polıtehnıkalyq ýnıversıtetiniń fılıalyn ashý bola alady. Biz elimizde Qytaıdyń jetekshi tehnıkalyq joǵary oqý oryndarynyń fılıaldaryn ashý úshin qolaıly jaǵdaı jasaýǵa daıynbyz», - dedi Qasym-Jomart Toqaev.
