Almatyda 160-tan astam kýrsant ant berdi
ASTANA. KAZINFORM — Almaty qalasynda áskerı ınstıtýt kýrsanttarynyń saltanatty ant berý rásimi ótti. Bul týraly QR Qorǵanys mınıstrligi jazdy.
Radıoelektronıka jáne baılanys áskerı-ınjenerlik ınstıtýtynda 160-tan astam birinshi kýrs kýrsanty Otanǵa adal bolýǵa ant berdi.
Bir aı ishinde birinshi kýrs kýrsanttary jas jaýynger kýrsynan ótip, áskerı daıyndyqtyń negizderin meńgerip, minezderin shyńdap, armııalyq ómir saltyna beıimdeldi.
Saltanatty rásim bastalmas buryn qonaqtar úshin áskerı ınstıtýttyń oqý ortalyǵyna ekskýrsııa uıymdastyryldy. Jańa taktıkalyq alańda áskerı daıyndyq elementteri men urys jaǵdaıyna barynsha jaqyn ortada drondardyń shabýylyn toıtarý boıynsha sabaqtar kórsetildi.
Instıtýt bastyǵy general-maıor Nurtas Qabaqov kýrsanttardy quttyqtap, bul is-sharanyń mańyzdylyǵyn atap ótti.
— Búgingi saltanatty rásimdi oqý ortalyǵynda ótkizýimizdiń sebebi ata-analar balalarynyń áskerı bilimdi qalaı meńgerip jatqanyn óz kózderimen kórsin degen oı edi. Bizdiń oqý ornymyz zamanaýı syn-qaterler men qaýipter jaǵdaıynda tapsyrmalardy oryndaı alatyn jańa býyn ofıtserlerin daıarlaıdy. Búgin sizder el qaýipsizdigin kúzetetin qatarǵa qosylyp otyrsyzdar. Qazaqstan armııasynyń bolashaǵy sizderdiń tártipterińizge, bilimderińizge jáne tabandylyqtaryńyzǵa baılanysty, — dedi ol.
Іs-shara barysynda alǵash ret oqý ornynyń gımni oryndaldy. Onyń sózin ınstıtýt bastyǵy aqyn ári kompozıtor Nurlan Nurtazınmen birlesip jazǵan. Bul án birinshi kýrs kýrsanttary úshin jaı ǵana án emes, áskerı ınstıtýttyń abyroıy men dańqyn saqtaý jónindegi naǵyz antqa aınaldy.
— Búgin men úshin erekshe kún. Áskerı ant berý — zor qurmet pen úlken jaýapkershilik. Endi biz jaı ǵana kýrsant emespiz, Otan qorǵaýshylarymyz, sol senimdi aqtaý úshin barymdy salamyn, — dedi kýrsant Arlen Jaqashbaev.
Bıyl áskerı joǵary oqý ornyna Qazaqstannyń barlyq óńirinen 200-den astam kýrsant qabyldandy. Olardyń arasynda áskerı daıarlyǵy joǵary baǵalanǵan, «Sarbaz 2.0» baǵdarlamasy boıynsha qabyldanǵan 30-ǵa jýyq merzimdi qyzmettegi sarbaz bar. Sonymen qatar, Ujymdyq qaýipsizdik týraly shart uıymyna múshe memleketter arasyndaǵy yntymaqtastyq aıasynda ınstıtýtqa Qyrǵyzstan men Tájikstannan segiz azamat oqýǵa tústi.
Aıta keteıik, bıyl ınstıtýtta eki jańa mamandyq ashyldy. Olar – «áskerı istegi krıptologııa» jáne «aýdarma isi». Bul baǵyttar qazirgi zamanǵy syn-qaterler men qaýipter jaǵdaıynda suranysqa ıe mamandardy daıarlaýdyń negizine aınalmaq.
Buǵan deıin Ulttyq ulan kýrsanty oqýlyq jazyp shyqqanyn jazǵan bolatynbyz.