Qazaqstan Qytaıdyń eń iri jasyl tehnologııalar bankimen áriptestik ornatty
ASTANA. KAZINFORM - Halyqaralyq jasyl tehnologııalar jáne ınvestıtsııalyq jobalar ortalyǵy (HJTIJO) men Shanhaı ǵylymı-tehnıkalyq almasý ortalyǵy Azııadaǵy jasyl tehnologııalar boıynsha iri platformalardyń birine - Green Technology Bank-pen tikeleı qarym-qatynasqa jol ashatyn yntymaqtastyq týraly strategııalyq kelisimge qol qoıdy. Bul týraly Ekologııa jáne tabıǵı resýrstar mınıstrligi málimdedi.
Kelisim Qazaqstan men Qytaı arasyndaǵy ǵylymı-tehnıkalyq dıalogty nyǵaıtýdaǵy mańyzdy qadam boldy jáne respýblıka ekonomıkasyna ozyq ekologııalyq sheshimderdi jedel engizý úshin keń perspektıvalar ashty. Endi qazaqstandyq kásiporyndar, zertteý ortalyqtary men startaptar jańartylatyn energetıka, sý resýrstary, qaldyqtardy óńdeý, agroekologııa jáne basqa da baǵyttardaǵy ınnovatsııalardy qosa alǵanda, Qytaıdyń derekter bazasyndaǵy ázirlemelerdi paıdalana alady.
Qol jetkizilgen kelisimge sáıkes, Shanhaı ǵylymı-tehnıkalyq almasý ortalyǵy qazaqstandyq tarapty tehnologııalyq derekqorǵa jáne Green Technology Bank saraptamalyq jelisine qoljetimdilikpen qamtamasyz etý jóninde mindetteme aldy. Budan basqa, jyl saıyn qazaqstandyq kompanııalardyń qatysýymen - roadshoýlar, forýmdar men iskerlik mıssııalardy qosa alǵanda - Qytaı tarapynan qarjylyq qoldaý kórsetý múmkindigimen birlesken is-sharalardy uıymdastyrý kózdelgen. Taǵy bir jekelegen baǵyt - Qazaqstandaǵy jıyrma basym jasyl jobany júıeli baǵalaý jáne súıemeldeý: sarapshylar jumys josparlaryn ázirleýge qatysady jáne tehnologııalardy jergilikti naryqtyń sharttary men talaptaryna beıimdeý boıynsha usynymdar beredi.
HJTIJO Basqarma tóraǵasynyń m.a. Sáken Qalqamanov qol qoıylǵan qujattyń strategııalyq mańyzdylyǵyn atap ótti.
- Qazaqstan jasyl tehnologııalar salasyndaǵy jahandyq kóshbasshylardyń biriniń tájirıbesi men sheshimderin tikeleı qoldana alady. Bul ekologııalyq ınnovatsııalardy jedel engizý, ınvestıtsııalar tartý jáne tehnologııalyq áriptestikti damytý úshin berik negiz jasaıdy. Biz muny elimiz úshin turaqty bolashaqty ilgeriletýdiń strategııalyq quraly retinde qarastyramyz, - dedi ol.
Eki tarap qol qoıylǵan kelisimniń «Bir beldeý, bir jol» sııaqty jahandyq bastamalar aıasyndaǵy ekijaqty ózara is-qımyldy kúsheıtip qana qoımaı, bilim almasý, jańa naryqtar ashý jáne birlesken jobalardy iske qosý arqyly Qazaqstannyń halyqaralyq jasyl kún tártibine kirigýiniń praktıkalyq quralyna aınalatynyna senim bildirdi.
Aıta keteıik, Astanada QR Prezıdentiniń Teleradıokesheni men Qytaı Medıa korporatsııasy (CMG) «Silk Way Star» halyqaralyq jobasy týraly kelisimge qol qoıdy.