Qazaqstan Qytaıdan Eýropaǵa deıingi júk tasymalyn tsıfrlandyrýdy usyndy
ASTANA. KAZINFORM — Qazaqstan Qytaıdan Eýropaǵa deıingi halyqaralyq kólik dálizderinde elektrondy qujattardy ózara taný jáne júk tasymaly týraly derekterdi biriktirý júıesin engizýdi usyndy. Bul týraly búgin ótip jatqan New Silk Way halyqaralyq forýmynda Kólik vıtse-mınıstri Jánibek Taıjanov aıtty.
Vıtse-mınıstr «Tsıfrlyq Jibek joly: jasandy ıntellekt jáne logıstıkalyq derekterdiń úzdiksiz almasýy» atty strategııalyq sessııada halyqaralyq júk tasymalyn jedeldetý úshin elder arasyndaǵy aqparat almasýdy jeńildetý qajet ekenin aıtty.
Onyń sózinshe, búginde júk tasymalyndaǵy keshigýdiń basty sebepteriniń biri — qujat rásimdeý men aqparat almasýǵa ketetin ýaqyt.
— Búginde júk tasymaly kóbine qujattardyń rásimdelýin kútip keshigedi. Konteınerdi ári qaraı jóneltý úshin tıisti rastaý nemese júk týraly aqparat qajet bolady. Ár shekara men portta bir málimet qaıta-qaıta engiziledi. Munyń bári ýaqyt joǵaltýǵa jáne kásipkerler shyǵynynyń artýyna ákeledi, — dedi vıtse-mınıstr.
Osy máseleni sheshý úshin Qazaqstan halyqaralyq seriktesterge úsh baǵyt boıynsha birlesip jumys isteýdi usyndy.
Birinshisi — Qytaıdan Eýropaǵa deıingi búkil baǵytta elektrondy qujattardy ózara taný jáne kólik derekterin ortaq standarttarǵa sáıkestendirý. Bul rette ár memleket óz derekterin ózi saqtaıdy, biraq júktiń qozǵalysy týraly qajetti aqparat tasymalǵa qatysýshy taraptarǵa qoljetimdi bolady.
Ekinshisi — jasandy ıntellekt negizindegi daıyn sheshimderdi ózara bólisip, olardy halyqaralyq kólik dálizderiniń naqty ýchaskelerinde birlesip synaqtan ótkizý.
Úshinshi baǵyt shekaradaǵy rásimderdi úılestirýdi, táýekelderdi baǵalaýdyń ortaq tásilderin ázirleýdi jáne júkti jetkizý jyldamdyǵyn arttyrýdy qamtıdy.
— Birde-bir el kólik dálizin óz kúshimen tolyq tsıfrlandyra almaıdy. Konteınerdiń jetkizilý ýaqyty joldaǵy eń baıaý ýchaskege baılanysty. Sondyqtan halyqaralyq deńgeıde birlesip áreket etý mańyzdy, — dedi Jánibek Taıjanov.
Vıtse-mınıstr Qazaqstan halyqaralyq kólik dálizderiniń biryńǵaı tsıfrlyq keńistigin seriktes memlekettermen birlesip damytýǵa daıyn ekenin jetkizdi.
Aıta keteıik, buǵan deıin jolaýshy jáne júk tasymalynyń kórsetkishteri qalaı ózgergeni týraly habarlandy.
