Qazaqstan Qytaıdaǵy halyqaralyq taý-ken kórmesinde alǵash ret ulttyq stendin tanystyrdy
ASTANA.KAZINFORM - QR Ónerkásip jáne qurylys mınıstri Ersaıyn Naǵaspaev QHR Tabıǵı resýrstar mınıstriniń shaqyrýymen Tıantszın qalasynda (QHR) ótken Taý-ken ónerkásibi salasyndaǵy halyqaralyq yntymaqtastyq jónindegi mınıstrler forýmyna, sondaı-aq China Mining 2026 XXVIII halyqaralyq konferentsııasy men kórmesine qatysty.
China Mining — geologııa, mıneraldyq resýrstar jáne taý-ken ónerkásibi salasyndaǵy eń iri ári yqpaldy halyqaralyq alańdardyń biri. Jyl saıynǵy is-sharaǵa 35 mınıstrdi qosa alǵanda, 65 eldiń, iri ónerkásiptik korporatsııalar, sondaı-aq sarapshylar qaýymdastyǵynyń ókilderi qatysty. Negizgi taqyryp — «Ózara tıimdi yntymaqtastyq, «jasyl» jáne ıntellektýaldy damý».
QR Ónerkásip jáne qurylys mınıstri Ersaıyn Naǵaspaev «China Mining 2026» kórmesiniń ashylý saltanatynda sóılegen sózinde memleket basshylary Qasym-Jomart Toqaev pen Sı Tszınpın arasyndaǵy tyǵyz dostyq baılanystar men ózara túsinistik arqasynda qol jetkizilgen Qazaqstan men Qytaı arasyndaǵy strategııalyq seriktestiktiń joǵary deńgeıin atap ótti.
Mınıstr sońǵy jyldary iskerlik jáne ınvestıtsııalyq baılanystardyń turaqty ósip, ónerkásiptik yntymaqtastyqtyń tereńdep kele jatqanyn aıryqsha atap kórsetti.
Búginde Qazaqstanda qytaılyq seriktesterdiń qatysýymen shamamen 11 myń kásiporyn jumys isteıdi. Qazaqstannyń iri seriktesteri qatarynda munaı-gaz, taý-ken, energetıka, ınfraqurylym, joǵary tehnologııalar jáne basqa da salalarda túrli jobalardy iske asyryp jatqan CNPC, Sinopec, CITIC Group, Zijin Mining, East Hope Group, Huawei, PowerChina, SANY, Fufeng, Lihua Group syndy ózge de kompanııalar bar.
-Qazaqstan qosylǵan qunnyń jańa tizbekterin jáne zamanaýı óndiristerdi birlesip qurý múmkindigin usynady. Biz qytaılyq jáne halyqaralyq kompanııalardy geologııalyq barlaý, mıneraldyq shıkizatty óndirý jáne tereń óńdeý salary boıynsha yntymaqtastyqqa shaqyramyz. Zamanaýı tehnologııalardy tartýǵa jáne óndiristerdi lokalızatsııalaýǵa erekshe mán beremiz. Ónerkásiptik yntymaqtastyqty jańa deńgeıge shyǵarý jáne elderimizdiń uzaq merzimdi múddelerine saı keletin jobalardy iske asyrý mańyzdy,— dep atap ótti Ersaıyn Naǵaspaev.
Sondaı-aq konferentsııada Qytaı Halyq Respýblıkasy Memlekettik keńesiniń vıtse-premeri He Lıfen sóz sóıledi. Іs-shara qorytyndysy boıynsha ekijaqty kelissózder júrgizilip, onyń barysynda Ersaıyn Naǵaspaev pen He Lıfen joǵary deńgeıde qol jetkizilgen ýaǵdalastyqtar aıasyndaǵy ónerkásiptik yntymaqtastyqtyń keleshegin talqylady.
Qazaqstan China Mining 2026 halyqaralyq taý-ken kórmesinde alǵash ret taý-ken óndirý jáne geologııalyq barlaý kompanııalaryn, salalyq uıymdar men perspektıvaly ınvestıtsııalyq jobalardy biriktirgen biryńǵaı ulttyq stendin usyndy. Stendti QR Ónerkásip jáne qurylys mınıstri Ersaıyn Naǵaspaev pen QHR Tabıǵı resýrstar mınıstri Lıý Gohýn birlesip ashty.
Osyǵan deıin Qazaqstannyń jyl sońyna deıin Qytaımen shekaraaralyq QR tólemderin iske qosatyny týraly jazdyq.
