Qazaqstan Qytaı týrısteri arasynda eń suranysqa ıe 5 eldiń qataryna kirdi
ASTANA. KAZINFORM — Qazaqstan QHR týrısteriniń qonaqúılerdi brondaý ósimi boıynsha top-5 eldiń qataryna kirdi, dep habarlaıdy «Kazakh Tourism» UK» AQ baspasóz qyzmeti.
Qazaqstan Qytaıdyń týrıstik naryǵynda óz pozıtsııasyn nyǵaıtyp jatyr. Tongcheng Travel iri onlaın-týrıstik kompanııasynyń derekterine sáıkes, bizdiń elimiz QHR-da Ulttyq kún men Kúzdiń ortasy merekesin atap ótýge arnalǵan 8 kúndik demalysta halyqaralyq qonaqúılerdi brondaýdyń eń joǵary ósimi baıqalǵan 5 sheteldik baǵytqa endi.
Bıyl Qytaıda shetelge uzaqmerzimdi toptyq týrlarǵa qyzyǵýshylyq artyp keledi. Olardyń sany jyldyq kórsetkishpen salystyrǵanda eki esege jýyq ósti. Mereke kúnderi QHR týrısteri tarapynan Ortalyq Azııa, Taıaý Shyǵys jáne Afrıkanyń birqatar elinde halyqaralyq qonaqúılerdi brondaý edáýir kóbeıgeni baıqalady. Suranystyń ósimi boıynsha kóshbasshylar bestigine Saýd Arabııasy, Mysyr, Jańa Zelandııa, Qazaqstan jáne Birikken Arab Ámirlikteri kirip otyr.
— Qazaqstan Qytaı aýdıtorııasy úshin tartymdy baǵytqa aınalyp keledi. Bıylǵy 9 aıda ǵana elimizge QHR kelýshiler qatary 675 myńnan asty. Al ótken jyldyń 12 aıynda bul kórsetkish 655 myń adamdy quraǵan bolatyn. Bul — elimizge degen joǵary qyzyǵýshylyqty jáne Qytaıdyń týrıstik naryǵynda elimizdi ilgeriletý, vızalyq rásimderdi jeńildetý jáne eki el arasyndaǵy tikeleı áýe qatynastaryn keńeıtý boıynsha júıeli jumystyń tıimdiligin kórsetedi, — dedi «Kazakh Tourism» UK» AQ Basqarma tóraǵasynyń mindetin atqarýshy Danıel Serjanuly.
Aıta keteıik, QHR iri izdeý júıesi Baidu derekterine sáıkes, 2025 jylǵy qyrkúıekte Qazaqstan jaıly izdenister sany táýligine orta eseppen 420–430 myńdy quraǵan. Eń joǵary belsendilik Gýandýn men Chjetszıan provıntsııalarynda, Beıjiń qalasynda, Shyńjań-Uıǵyr avtonomııalyq aýdanynda jáne Shandýn provıntsııasynda baıqaldy. Bul Qazaqstanǵa degen qyzyǵýshylyq shekara mańyndaǵy aýmaqtarmen shektelmeı, Qytaıdyń ekonomıkalyq turǵydan damyǵan óńirlerin de qamtyǵanyn kórsetedi.
Budan buryn Májilis depýtaty Erbolat Saýryqov Premer-mınıstr Oljas Bektenovtiń atyna saýal joldap, ishki týrızmdi damytýdyń ulttyq baǵdarlamasyn qabyldaýdy usyndy.