Qazaqstan-Qytaı tsıfrlyq astyq saýdasy platformasynda alǵashqy mámile tirkeldi
ASTANA. KAZINFORM – Qytaıdyń qoldanystaǵy tsıfrlyq astyq saýdasy platformasynyń qazaqstandyq bólimi pılottyq rejımde iske qosyldy. Bul týraly Aýyl sharýashylyǵy mınıstrligi habarlady.
Otandyq SN Trade Company seriktestigi qytaılyq Yihai (Changji) Oils&Grains Industries Co., Ltd kompanııasyna 200 tonna zyǵyr maıynyń synaq partııasyn jetkizý týraly kelisti.
Onlaın alańnyń iske qosylýy Azyq-túlik kelisimshart korporatsııasy qytaılyq seriktestermen byltyrdan beri júrgizip kele jatqan aýyl sharýashylyǵy saýdasynyń birlesken tsıfrlyq tetigin qurý týraly kelissózderdiń jalǵasy deýge bolady.
Ótken aptada QHR Memlekettik azyq-túlik jáne strategııalyq rezervter jónindegi basqarmasynyń basshysy Lıý Hýansınniń Astanaǵa sapary aıasynda «Azyq-túlik kelisimshart korporatsııasy» UK» AQ men Qytaıdyń Ulttyq azyq-túlik jáne strategııalyq rezervter jónindegi basqarmasynyń (NAFRA) janyndaǵy Astyq saýdasyn úılestirý ortalyǵy yntymaqtastyq týraly kelisimge qol qoıdy.
Qujat taraptardyń Qazaqstan men Qytaı arasynda astyq jáne maıly daqyldar ónimderiniń tsıfrlyq saýdasyn damytý nıetin dáleldedi.
Azyq-túlik kelisimshart korporatsııasynyń Beıjińdegi ókildigi pılottyq mámileniń qazaqstandyq paıdalanýshylar úshin qyzmetti synaqtan ótkizýge, sondaı-aq tehnıkalyq kemshilikterdi anyqtaýǵa jáne joıýǵa múmkindik beretinin atap ótti.
Bastapqy kezeńde platformanyń túrjınaǵy negizinen dándi daqyldar men maıly daqyldarǵa — kúnbaǵys, raps, zyǵyr jáne soıaǵa baǵyttalǵan. Bul tizim bolashaqta ımporttaýshylardyń suranysyna jáne otandyq jetkizýshilerdiń eksporttyq múmkindikterine baılanysty keńeıýi múmkin.
Saýda-sattyqtar ózara árekettesýdiń ashyq aýktsıondar, taraptardyń kelisýi boıynsha mámileler jáne ónimdi bekitilgen baǵamen satý sııaqty birneshe tetikterin alǵa tartyp otyr. Mindettemelerdiń oryndalýyn qamtamasyz etý úshin kepildik jarnasy kózdelgen, qatysýshylar arasyndaǵy qarjylyq esep aıyrysýlardy platforma arqyly júzege asyrý usynylady.
Qytaıdyń astyq saýdasy platformasy QHR-daǵy 50 myń aýyl sharýashylyǵy kásiporyndaryn biriktiredi jáne 20 jyldan astam ýaqyt boıy jumys istep keledi. Oǵan qazaqstandyq kompanııalardyń qosylýy aýyl sharýashylyǵy eksportyn arttyrýǵa qolaıly múmkindikter ashady jáne Memleket basshysynyń AÓK sektoryndaǵy tsıfrlandyrýdy damytý boıynsha tapsyrmasyn iske asyrýǵa yqpal etedi.
- Bul jobadaǵy bizdiń basty maqsatymyz – qazaqstandyq aýyl sharýashylyǵy óndirýshileri men treıderlerine óz ónimderin onlaın satýǵa, satyp alýshylardy tabýǵa jáne Qytaı naryǵyna qoljetimdilikti keńeıtýge múmkindik berý, - dep atap ótti «Azyq-túlik kelisimshart korporatsııasy» UK» AQ Basqarma tóraǵasy Asylhan Djývashev.
Aıta keteıik, Qazaqstannyń astyq eksporty 11,7 mln tonnaǵa jetti.
