Qazaqstan-Qytaı shekarasyndaǵy sanıtarııalyq baqylaý qalaı júrgiziledi
ASTANA. KAZINFORM – Qazaqstan men Qytaı ókilderi memlekettik shekaradaǵy sanıtarııalyq-karantındik baqylaý máselelerin talqylady, dep habarlaıdy Densaýlyq saqtaý mınıstrligi.
2026 jylǵy 7 shildede Sanıtarııalyq-epıdemıologııalyq baqylaý komıtetiniń tóraǵasy – Qazaqstan Respýblıkasynyń Bas memlekettik sanıtarııalyq dárigeri Sarhat Beısenova Qytaı Halyq Respýblıkasynyń Bas kedendik baqylaý basqarmasy Sanıtarııalyq-karantındik baqylaý departamentiniń ókilderimen kezdesti.
Kezdesý Ulttyq saraptama ortalyǵynyń alańynda ótti.
– Kezdesý barysynda taraptar Qazaqstan-Qytaı memlekettik shekarasyndaǵy sanıtarııalyq-karantındik baqylaý salasynda tájirıbe almasý máselelerin talqylady, – delingen habarlamada.
Taraptar memlekettik shekarany sanıtarııalyq qorǵaý salasyndaǵy yntymaqtastyqty nyǵaıtý jáne sanıtarııalyq-karantındik baqylaýdy júzege asyrý boıynsha tájirıbe almasý máselelerine erekshe nazar aýdardy.
Sonymen qatar pandemııalyq qaterlerge daıyndyqty qamtamasyz etý, profılaktıka jáne den qoıý sharalaryna qatysty Halyqaralyq medıtsınalyq-sanıtarııalyq qaǵıdalarǵa engizilgen ózgeristerdi iske asyrý máseleleri qaraldy.
Qazaqstanǵa jumys sapary aıasynda Qytaı delegatsııasynyń ókilderi Astana halyqaralyq áýejaıyndaǵy sanıtarııalyq-karantındik pýnkttiń jumysymen tanysty.
– Kezdesý qorytyndysy boıynsha taraptar memlekettik shekarany sanıtarııalyq qorǵaý salasyndaǵy ekijaqty yntymaqtastyqty odan ári nyǵaıtýǵa, tájirıbe almasýdy jalǵastyrýǵa jáne ózara is-qımyldy damytýǵa daıyn ekenin rastady, – dep atap ótti vedomstvodan.
Aıta keteıik, fıtosanıtarııalyq talapqa saı kelmeıtin 6 tonna qııar Reseıge qaıtaryldy.
