Qazaqstan-Qytaı shekarasyndaǵy avtokólik ótkizý pýnktteri ýaqytsha jabylady
ASTANA. KAZINFORM — Qazaqstan Respýblıkasy Memlekettik kirister komıteti Qazaqstan men Qytaı shekarasyndaǵy ótkizý pýnktteriniń jumysy ýaqytsha toqtatylatynyn habarlady.
— Qytaı Halyq Respýblıkasynyń Qurylǵan kúni (2025 jylǵy 1-3 qazan) jáne Kúzgi meıram (2025 jylǵy 6 qazan) merekelerine baılanysty Qazaqstan-Qytaı shekarasyndaǵy avtokólik ótkizý pýnktteri ýaqytsha jumysyn toqtatady. Osy kúnderi jeke tulǵalarǵa, kólik quraldary men júk tasymaldaryna ótkizý júrgizilmeıdi, — dep málim etti komıtettegiler.
Sonymen qatar, temirjol ótkizý pýnktteri qalypty rejımde jumysyn jalǵastyryp, kólik-logıstıka baılanysynyń turaqtylyǵyn qamtamasyz etedi.
Aıta keteıik, 2025 jylǵy 17 qyrkúıekte Qarjy mınıstri avtomobıl kóligimen Memlekettik shekarasyn kesip ótý, sondaı-aq júk pen taýarlardy tasymaldaý erejelerine ózgerister engizý týraly buıryqqa qol qoıdy. Jańa ózgeristerge sáıkes, jergilikti atqarýshy organdar endi shekaralyq ótkizý pýnktteriniń janynan kútý aımaqtaryn uıymdastyrýy tıis.