Qazaqstan, Qytaı, Reseı jáne Mońǵolııa Altaıdaǵy arheologııalyq zertteýlerdi birlesip júrgizedi – sheteldegi qazaq baspasózi

Aptap ystyqqa baılanysty Tashkenttiń jerústi metro poıyzdarynyń jyldamdyǵy shekteldi – ÓzA

Ózbekstan astanasy Tashkentte aptap ystyqqa baılanysty jerústi metro jelilerinde poıyzdardyń qozǵalys jyldamdyǵyna ýaqytsha shekteý engizildi.

Bul týraly osy aptada «ÓzA» aqparat agenttigi málimdedi. 

Ózbekstan Kólik mınıstrliginiń málimetinshe, elde aýa raıynyń kúrt ysýyna baılanysty jerústi temirjol relsteriniń temperatýrasy qaýipsizdik shegi sanalatyn 55 gradýstan asyp ketken. Osyǵan oraı 15 shildeden bastap kún saıyn saǵat 18:00-ge deıin poıyzdardyń jyldamdyǵy saǵatyna 60 shaqyrymnan 40 shaqyrymǵa deıin tómendetiledi.

Vedomstvonyń habarlaýynsha, bul ózgeris jerústi metro jelilerindegi poıyzdardyń qozǵalys aralyǵyna áser etýi múmkin. Sonyń saldarynan poıyzdardyń kelý aralyǵy 14 mınýtqa deıin uzarýy yqtımal. Al jerasty metro jelileri burynǵydaı qalypty rejımde jumysyn jalǵastyrady.

Sondaı-aq osy aptada «ÓzA»-da «Qazaqstan Ózbekstannyń negizgi úsh saýda seriktesiniń qatarynda qaldy» degen taqyryptaǵy aqparat jarııalandy. 

Habarlamada aıtylýynsha, 2026 jyldyń qańtar–mamyr aılarynda Ózbekstan álemniń 185 elimen syrtqy saýda operatsııalaryn júrgizdi. Osy kezeńde eldiń eń iri saýda seriktesi Qytaı bolsa, Reseı ekinshi, Qazaqstan úshinshi orynda tur.

Ózbekstan Ulttyq statıstıka komıtetiniń málimetinshe, bes aıdaǵy syrtqy saýda aınalymy Qytaımen – 7,7 mlrd AQSh dollaryn, Reseımen – 5,8 mlrd dollardy, al Qazaqstanmen 2,3 mlrd dollardy qurady. Sondaı-aq Túrkııa (1,2 mlrd dollar), Aýǵanstan (915,8 mln dollar), Frantsııa (771,9 mln dollar), Koreıa Respýblıkasy (747,8 mln dollar), Birikken Arab Ámirlikteri (746,6 mln dollar), Germanııa (501,9 mln dollar) jáne Qyrǵyzstan (469 mln dollar) Ózbekstannyń jetekshi saýda seriktesteriniń qataryna endi.

Statıstıkaǵa sáıkes, Qytaı men Reseı Ózbekstannyń negizgi saýda seriktesteri retindegi pozıtsııasyn saqtap qaldy. Sonymen birge Ortalyq Azııa memleketterimen, Eýropa jáne Taıaý Shyǵys elderimen saýda-ekonomıkalyq baılanystardyń nyǵaıýy jalǵasyp keledi.

Qazaqstan, Qytaı, Reseı jáne Mońǵolııa Altaıdaǵy arheologııalyq zertteýlerdi birlesip júrgizedi – Halyq gazeti

Reseıdiń Altaı memlekettik ýnıversıtetinde Jibek joly arheologııalyq yntymaqtastyq zertteý ortalyǵynyń Altaı bólimshesi (Qytaı–Reseı Uly Altaı arheologııalyq zertteý ortalyǵy) ashyldy. Jańa qurylym Qazaqstan, Qytaı, Reseı jáne Mońǵolııa ǵalymdarynyń Altaı óńirindegi arheologııalyq zertteýlerin úılestiretin halyqaralyq alańǵa aınalady, dep habarlaıdy Halyq gazeti basylymy. 

Atalǵan basylymnyń málimetinshe, ortalyq Altaı taýy men oǵan shektes aýmaqtardaǵy transshekaralyq arheologııalyq zertteýlerdi damytýǵa, ejelgi kóshpeli órkenıettiń qalyptasýy men damýyn, sondaı-aq Dalalyq Jibek joly boıyndaǵy mádenı baılanystardy zertteýge basymdyq beredi. Sonymen qatar tórt el arasynda uzaq merzimdi ǵylymı yntymaqtastyq mehanızmi qurylyp, arheologııalyq derekter men tarıhı qujattardy ortaq paıdalaný, qashyqtan zertteý tehnologııalaryn engizý jáne jas ǵalymdardy birlesip daıarlaý kózdelgen.

Joba aıasynda Qytaı, Reseı, Mońǵolııa jáne Qazaqstan arheologtarynyń qatysýymen ǵylymı semınarlar, birlesken arheologııalyq barlaý jáne qazba jumystary uıymdastyrylady. Sondaı-aq Altaı aımaǵyndaǵy iri qorymdar men jartas sýretterine dalalyq zertteýler júrgizilip, Eýrazııa dalalyq arheologııasy boıynsha halyqaralyq ǵylymı yntymaqtastyqty keńeıtý josparlanyp otyr.

Sondaı-aq osy aptada Halyq gazeti basylmynda «Sı Tszınpın jasandy ıntellektti damytý men basqarýdyń tórt jolyn usyndy» degen taqyryptaǵa aqparat jaryq kórdi.

Qytaılyq BAQ-tyń deregine súıensek, Qytaı Halyq Respýblıkasynyń Tóraǵasy Sı Tszınpın 2026 jylǵy Dúnıejúzilik jasandy ıntellekt konferentsııasy men jahandyq jasandy ıntellektti basqarý jónindegi joǵary deńgeıdegi kezdesýdiń ashylýynda sóılep, jasandy ıntellektti damytý jáne basqarýdyń tórt negizgi baǵytyn atady, dep habarlaıdy Halyq gazeti basylymy. 

Ol ınnovatsııany jedeldetý úshin ashyqtyq pen ózara tıimdi yntymaqtastyqty keńeıtýdi, ashyq bastapqy kodty damytý men tehnologııalyq jetistikterdi ónerkásipte keńinen qoldanýdy usyndy. Sonymen qatar, jasandy ıntellekt salasyndaǵy táýekelderdi tıimdi basqarý maqsatynda zańnamany jetildirý, tehnıkalyq baqylaý júıelerin qurý, erte eskertý jáne tótenshe jaǵdaılarǵa den qoıý tetikterin kúsheıtý qajettigin atap ótti.

Sı Tszınpın sondaı-aq órkenıetter arasyndaǵy ózara túsinistik pen yntymaqtastyqty nyǵaıtý úshin jasandy ıntellekt múmkindikterin paıdalanýǵa, al jahandyq deńgeıde BUU-nyń úılestirýshi rólin kúsheıtip, basqarý erejeleri men tehnıkalyq standarttardy úılestirýge shaqyrdy. Onyń aıtýynsha, jasandy ıntellekt adamzattyń ıgiligine qyzmet etip, damýshy elderdiń tsıfrlyq jáne tehnologııalyq alshaqtyǵyn azaıtýǵa yqpal etýi tıis.

Qazaqstan men Iran yntymaqtastyqty nyǵaıtý jóninde ýaǵdalastyqqa qol jetkizdi – Eurasia Today

Qazaqstan men Iran kópqyrly yntymaqtastyqty odan ári nyǵaıtý jóninde birqatar ýaǵdalastyqqa qol jetkizdi. Bul týraly Qazaqstannyń Irandaǵy Tótenshe jáne Ókiletti Elshisi Ońtalap Ońalbaevtyń Iran Syrtqy ister mınıstriniń kómekshisi – Eýrazııa departamentiniń bas dırektory Manýchehr Moradımen kezdesýiniń qorytyndysynda málim boldy.

Bul týraly osy aptada Qyrǵyzstanda shyǵatyn Eurasia Today aqparat agenttigi habarlady. 

Atalǵan BAQ-tyń keltirgen derekterine súıensek, kelissóz barysynda taraptar saıası, saýda-ekonomıkalyq, ınvestıtsııalyq jáne mádenı-gýmanıtarlyq yntymaqtastyqtyń qazirgi jaı-kúıi men ony odan ári damytý máselelerin talqylady. Sondaı-aq Iran Prezıdenti Masýd Pezeshkıannyń 2025 jylǵy jeltoqsanda Qazaqstanǵa jasaǵan resmı sapary barysynda qol jetkizilgen kelisimderdi iske asyrý barysyna erekshe nazar aýdaryldy.

Kezdesý qorytyndysynda eki tarap joǵary deńgeıdegi ózara saparlardy uıymdastyrýdy, úkimetaralyq komıssııanyń kezekti otyrysyn ótkizýdi jáne ekijaqty yntymaqtastyqtyń barlyq baǵyttary boıynsha birlesken jumysty jalǵastyrýǵa daıyn ekenin rastady.

Irannyń otyryp oınaıtyn voleıbol quramasy toǵyzynshy ret álem chempıony atandy – ParsToday

Qytaıdyń Hanchjoý qalasynda ótken otyryp oınaıtyn voleıboldan XIV álem chempıonatynyń fınalynda Iran quramasy Bosnııa jáne Gertsegovına komandasyn 3:1 esebimen jeńip, toǵyzynshy ret álem chempıony atandy, dep jazdy ParsToday aqparat agenttigi. 

ParsToday aqparat agenttiginiń málimeti boıynsha, bas bapker Hadı Rezaıdiń jetekshiligindegi Iran quramasy osylaısha álem chempıonattaryndaǵy rekordtyq toǵyzynshy altyn júldesin ıelendi. Buǵan deıin komanda segiz ret álem chempıony atanyp, eki márte kúmis jáne bir ret qola júldege qol jetkizgen.

Álem chempıonatynyń fınalyna shyqqan Iran men Bosnııa jáne Gertsegovına quramalary 2028 jyly Los-Andjeleste ótetin Paralımpıada oıyndarynyń joldamasyna ıe boldy.

Toqaev: Qazaqstan Qytaıdy Eýropamen baılanystyratyn negizgi logıstıkalyq ortalyqqa aınalýy tıis – TRT

Prezıdent Qasym-Jomart Toqaev Qytaıǵa jumys sapary barysynda Shanhaıda osy eldiń jetekshi joǵary tehnologııalyq kompanııalarynyń basshylarymen kezdesip, Qazaqstannyń Qytaıdy Ortalyq Azııa, Kavkaz, Taıaý Shyǵys jáne Eýropamen baılanystyratyn negizgi kólik-logıstıkalyq ortalyqqa aınalýy eldiń strategııalyq maqsaty ekenin málimdedi.

Bul týraly osy aptada Túrkııa Radıo Televızııa portaly habarlady.

«TRT» basylymy Aqordanyń málimetine súıenip habarlaýynsha, Memleket basshysy Qazaqstan aýmaǵy arqyly 13 halyqaralyq kólik dálizi ótetinin, al Qytaı men Eýropa arasyndaǵy temirjol júk tasymalynyń shamamen 85 paıyzy Qazaqstan arqyly júzege asyrylatynyn aıtty. Sondaı-aq sońǵy 15 jylda kólik-logıstıka ınfraqurylymyna 35 mlrd dollardan astam ınvestıtsııa tartylǵanyn atap ótti.

Prezıdenttiń aıtýynsha, ótken jyly Qazaqstan men Qytaı arasyndaǵy taýar aınalymy rekordtyq 49 mlrd dollarǵa jetse, Qytaıdyń Qazaqstan ekonomıkasyna salǵan ınvestıtsııasy 30 mlrd dollardan asty. Shanhaıdaǵy sapar aıasynda jasandy ıntellekt, tsıfrlandyrý, kólik ınfraqurylymy, qarjy jáne agroónerkásip salalaryn qamtıtyn jalpy quny 15 mlrd dollardan asatyn 70-ten astam kommertsııalyq kelisimge qol qoıyldy.