Qazaqstan Qytaı qor naryǵynda alǵash ret panda-oblıgatsııalar ornalastyrdy
ASTANA. KAZINFORM – Qazaqstan Qytaı qor naryǵynda ıýanmen nomınatsııalanǵan panda-oblıgatsııalardyń debıýttik shyǵarylymyn sátti júzege asyrdy, dep habarlaıdy QR Qarjy mınıstrligi.
2026 jylǵy 26 mamyrda ornalastyrylǵan oblıgatsııalardyń kólemi 3,4 mlrd ıýandy nemese shamamen 500 mln AQSh dollaryn qurady. Aınalys merzimi – 3 jyl, jyldyq kýpondyq mólsherlemesi – 1,9%.
Qarjy mınıstrliginiń málimetinshe, ótinimder kitabyn qalyptastyrý barysynda oblıgatsııalarǵa suranys usynystan eki ese asyp túsken.
Bul Qytaı ınstıtýtsıonaldyq ınvestorlarynyń Qazaqstan ekonomıkasynyń turaqty ósimine jáne memlekettik qaryz deńgeıiniń tómendigine degen senimin kórsetedi.
Sonymen qatar Qazaqstan BBB reıtıngi bar elder arasynda oblıgatsııalardy eń tómen mólsherlememen ornalastyryp, rekord ornatty. Bul kórsetkish AA reıtıngi bar memleketterdiń deńgeıine sáıkes kelgen.
– Rekordtyq tómen kýpondyq mólsherleme júrgizilip jatqan fıskaldyq jáne salyqtyq reformalardyń, sondaı-aq Memleket basshysynyń bastamasymen júzege asyp jatqan saıası ózgeristerdiń nátıjesi boldy, – dep málimdedi mınıstrlik.
Vedomstvonyń atap ótýinshe, panda-oblıgatsııalardy ornalastyrý kvazımemlekettik jáne korporatıvtik emıtentterdiń bolashaqtaǵy shyǵarylymdary úshin baǵdar qalyptastyrýǵa múmkindik beredi.
Mınıstrlik bul mámileni Qazaqstan men Qytaı arasyndaǵy jan-jaqty strategııalyq áriptestikti nyǵaıtýdyń mańyzdy kezeńi dep baǵalady.
Panda-oblıgatsııalar Pekın qarjy aktıvteri bırjasy men Astana halyqaralyq qarjy ortalyǵy bırjasynda lıstıngten ótedi.
Qarjy mınıstrligi memlekettik qaryz alý saıasaty boryshtyq portfeldi ártaraptandyrýǵa, qaryzǵa qyzmet kórsetý qunyn tómendetýge jáne halyqaralyq ınvestorlardyń Qazaqstannyń egemendi kredıttik beıinine degen senimin saqtaýǵa baǵyttalǵanyn málimdedi.
Sondaı-aq vedomstvo bul ornalastyrý bekitilgen syrtqy memlekettik qaryz alý baǵdarlamasy aıasynda júzege asqanyn atap ótti.
– Qazirgi ýaqytta memlekettik qaryz deńgeıi qaýipsiz ári basqarylatyn shekte saqtalyp otyr. Ol JІÓ-niń 20%-yn quraıdy. Bul kórsetkish belgilengen 32% lımıtten edáýir tómen jáne álemdegi eń tómen deńgeılerdiń biri sanalady, – dep atap ótti mınıstrlik.
Aıta keteıik, Ulttyq astyq operatory 2,45 mlrd rýbl kólemindegi halyqaralyq oblıgatsııalardy japty.
