Qazaqstan Qytaı kompanııalaryn sırek kezdesetin mıneraldardy birlesip ıgerýge shaqyrdy

ASTANA. KAZINFORM – Qazaqstan Respýblıkasy Premer-Mınıstriniń orynbasary – Syrtqy ister mınıstri Murat Nurtileý eki el arasyndaǵy ekonomıkalyq qarym-qatynastyń mańyzdy tustaryna toqtalyp ótti. 

«Qazaqstan Úkimeti qytaı tarapynyń ınvestıtsııalar kólemin arttyra túsýge degen nıetin tolyq quptaıdy. Qazir munaı-gaz, hımııa, metallýrgııa, agroónerkásip, taý-ken ónerkásibi jáne basqa da salalarda ondaǵan iri birlesken jobalar júzege asyryldy. Sonymen qatar, ozyq tehnologııalar, ınnovatsııa jáne ǵylymı-zertteýdegi áleýetimizdi ári qaraı jetildirý biz úshin asa mańyzdy», - dedi Murat Nurtileý Qytaıdyń Syrtqy ister mınıstrimen kezdesýden keıin BAQ-qa málimdeme jasap.

Mınıstrdiń aıtýynsha, eki el joǵary sapaly tehnologııalyq yntymaqtastyqqa erekshe nazar aýdaryp otyr.

«Atap aıtqanda, elimizde elektromobılder óndirisin qurý týraly qytaı tarapynyń usynysyna qazaq tarapy tolyqtaı qoldaý kórsetpek. Óz kezegimizde, sırek kezdesetin mıneraldar qoryn birlesip ıgerýge qytaı kompanııalaryn shaqyramyz», - dedi M. Nurtileý.

Buǵan deıin elimizdiń Syrtqy ister mınıstri Murat Nurtileý «Qazaq-Qytaı» yqpaldastyǵy buryn-sońdy bolmaǵan belesterge shyqqanyn aıtqan edi. 

Byltyr Qazaqstan men Qytaı arasyndaǵy taýar aınalymy 41 mlrd dollarǵa jetken.